ŞIRNEX - Cinîyê sîyasetmedarî, hemverê hewldayîşê betalkerdişê Pêameyîşê Stenbolî de reaksîyon ramojnayî û vatî: “Şîdet û qetilkerdişê cinîyan parçeyêk şerê taybetî yo. Ma do nêverdê ke pêameyîş bêro betalkerdene.”

 

Pêameyîşê Stenbolî, bi nameyê xo yê rast Pêameyîşê Konseyê Ewropayî yê Têkoşînê Hemverê Şîdêtî yê Hemverê Cinî û Şîdetê Mîyanê Keyeyî de yo. Na babete de zî pêameyîşê yewin ê mîyanneteweyî yo. Reya ewil 11ê Gulana 2011 de Stenbol de pêameyîş îmza rê ame akerdene. 2014 de ame viraştene û Adara 2019 de zî hetê 33 dewletan û Yewîya Ewropayî ra pêameyîş ame qebûlkerdene. Sewbîna reya yewin 24ê teşrîna peyêne 2011 de zî Pêameyîşê Stenbolî Tirkîya de meclîsî ra ame derbazkerdene û bi resmî. La nêame pratîzekerdene.

 

‘Pêameyîşê Stenbolî dano ciwîyayîş’

 

Hemsereka HDPyî ya qezaya Cizîrî Guler Tunçe, ard vîr ke dewletêke reya ewil Pêameyîşê Stenbolî îmza kerda dewleta tirkî ya. Lê pêameyîş tena serê kaxit de mend û Gulere wina va: “Cinî bi serran o her wareyê ciwîyayîş de bi hêrişan dir rî bi rî manenê. Xeynê nê hêrişê cinsî hemverê domanan zî zêde bî. Seba ke îqtîdar nêeşka vernîya cinîyê têkoşer bigîro û na rey zî verê xo da domanan. Eke Pêameyîşê Stenbolî bêameyîne pratîzekerdiş hende qetilkerdişê cinîyan û hêrişê cinsî hemverê domanan nêbîne. Ewro her cayê dinya de cinî semedê Pêameyîşê Stenbolî vejîyayê wareyan, vengê xo kenê berz û xo ver danê. Ma zî reyke bîn vanê, ‘Pêameyîşê Stenbolî dano ciwîyayîş.”

 

‘Îqtîdar şero taybet dano ciwîyayîş’

 

Gulere tewr peyîn wina va: “No şero taybet serê cinîyan de yeno jerdene. Wazenê cinîyan çin bikerê. Îqtîdaro ke pêameyîş reya ewil îmza kerd, çira nika game peyser erzeno. Selahîyetdarê Dîyanetî ke ewro vejîyenê televîzyonan cinîyan hedef ramojnenê. La vera nê cinî her roje xo ver danê û no xoverdayîşê înan her roje vila beno. Cinîyê AKPyijî çira vengê xo nêvejênê? Wa qetî cinî nêvinderê û tim xo ver bidê. Ganî ma vera nê şerê taybetî têkoşîn bikerê.”

 

‘Vengê şîdetî yew o, lazim o vengê cinîyan zî yew bo’

 

Hemşaredara Cizîrî Bêrîvan Kutluye ke vera ci qeyûm ame tayînkerdene zî şîdetê hemverê cinîyan şermezar kerd û vat: “Hemverê cinîyan hrndr hêriş yenê kerdene, îqtîdar tu wext cezaya ke heq kenê nêdayo. Betalkerdişê pêameyîşî nîno qebulkerdene. Ma wazenê ke maddeyê nê pêameyîşî bi ca bêrê, ma nêwazenê ke pêameyîş bêro betalkerdene. Ma seserra 21 de yê, la hema zî şîdetê hemverê cinîyan dewam keno. Ma vanê no pêameyîş, pawitişê cinîyan o. Ganî ma wayîrê pêameyîşî vejîyê. Vengê şîdetî yew o, lazim o vengê cinîyan zî yew bo. Ganî ma vengê xo berz bikerê. Lazim o ke cinîyê AKPyijî zî nê pêameyîşî bipawê. Ganî ma cinî xo biresnê yewbînan û nêverdê ke no pêameyîş bêro betalkerdene.”