MERKEZÊ XEBERAN - Goreyê xeberê ke ma çapemenî ra kom kerdî, menga tebaxe de 34 cinî ameyî kiştene û 10 cinî bi merdişî dir rî bi rî mendî û merdişê 20 cinîyan zî bi guman o.

 

Nika temamê dinya de seba vîrusê koronayî (Covîd-19) rewşêka îstîsna esta. Nê prosesî de zî rewşa cinîyan û têkoşînê cinîyan rewşêke cîya kerd. Dewlete bi heme hêzê xo destkewtişê cinîyan hedef girewt. Nika her roje cinî yenê kiştene, bi taciz û tecawuzî dir rî bi rî manena. Sewbîna hûmara domanê ke bi hêrişê cinsî dir rî bi rî manenê zî her roja ke şono zêdeyêr beno.

 

Prosesê pandemî de betalkerdişê Pêameyîşê Stenbolî zî ame rojeve. Tebaxe de cinî vejîyayî wareyan û wayîrê pêameyîşî vejîyayî. Vejîyayîşê cinîyan ê wareyan bi sebeb ke hukmat reyke bîn game peyser bierzo. Nê çî seba cinîyan girîng bî. Babeta tewr girîng zî babeta çawîşê pispor Mûsa Orhanî bi. Îpek Ere bi tecawizê Mûsa Orhanî dir rî bi rî mendebî û seba ke edalet bi ca bêro, Mûsa bêro tepiştiş, peynîya cuya xo ard. Pêwa protesto û reaksîyonan Mûsa Orhan ame tepiştiş labelê zîhniyetê serdest yê camêrî dimayê çend rojan Mûsa Orhanî serbest vera da. 

 

Zîhnîyetê serdestî reyke bîn zî hewldayîşê xo rayîr ver bi taciz, tecawuz û kiştişê cinîyan akerd. Temamê Tirkîya de menga tebaxe de şîdetê hemverê cibîyan zêdê bi. Goreyê dayeyê ke Platformê Ma do Kiştişê Cinîyan Vindarnê (KCDP) menga tebaxe de 27 cinî ameyî kiştene û 23 cinî bi hawayê bi guman dinyaya xo bedilnayê.

 

Ma xeberê ke derheqê kiştiş, şîdet, taciz û tecawuzî de vejîyayî kom kerdî. Ma do dayeyê menga tebaxe eşkera bikerê. Goreyê dayeyê ke ma kom kerdî menga tebaxe de 34 cinî ameyî kiştene. Merdilê 20 cinîyan zî bi guman o, 10 cinî zî bi merdişî dir rî bi rî mendî. 13 cinî bi şîdet, taciz û tecawuzî dir rî bi rî mendî. Sewbîna 8 domanî zî bi şîdet û tecawuzî dir rî bi rî mendî. 4 domanî zî bi hawayêko bi guman dinyaya xo bedilnayî.