MÊRDÎN - Cenazeyê bi desan kesê ke qedexeyê tebervejîyayîşê kuçeyan yê Nisêbînî de dinyaya xo bedilnayî, hema zî goristanê bêkesan de yê. Keyeyê ke 4 serrî yo seba cenazeyê domananê xo bigîrê, têkoşîn kenê û waştişnameyan nusnenê, nimûneyê gonî danê û wazenê gorêk domananê înan bibo.

 

Qezaya Nisêbînê Mêrdînî de 14ê Adara 2016 de qedexeyê tebervejîyayîşê kuçeyan ame îlankerdene û pêrodayîşan de nêzdîyê 80 kesî dinyaya xo bedilna. Cenazeyê xeylê kesî hema zî goristanê bêkesan de yê û keyeyî seba cenazeyan şinê dozgerîya Nisêbîn û Mêrdînî nimûneyê gonî danê.  

 

Ê hîn kesan DNAyî înan pê girewt û ameyî teslîmkerdene, la hema zî nêzdîyê 40 cenazeyî goristanê bêkesan de yê. Dimayê pêrodayîşan cenazeyan erşawitî şarsitanê derûdorî sey; Riha, Meletî û Dîlok. Înşaatê TOKÎyî de cenazeyê ke ameyî vetene zî erşawitî Stenbol.

 

Dosya mabêne dozgerîyan de şî û amî

 

Keyeyî 4 serrî yo ke xeylê rey şî Serdozgerîya Komara ya Nisêbîn û Mêrdînî û nimûneyê gonî dayî. Hîn keyeyî muracatê ÎHDyî Mêrdînî kerdî, nê prosesî de 4 rey nimûneyê gonî dayî. Dosyayê mabêne dozgerîyê Nisêbîn û Mêrdînî de şî û ameyî, muracatê înan nêameyî qebulkerdene û serdozgerîya komara ya Mêrdînî vat, babete girêdayê înan nîya û erşawitî dozgerîya qeza.

 

Keyeyî bi serran o pawenê

 

Keyeyê Abdulselam Deger yê HPGyij (Kendal Qoser) zî yew nê keyeyan ra yo. Dayîka ey Leyla Deger (47) dîyar kerd ke 4 serî yo seba cenazeya lajê xo 3 rey nimûneyê gonî daya serdozgerîya Komara ya Mêrdînî û pêwa nê tu averşîyayîş çin o.

 

'Çar serran de 3 rey nimûneyê gonî'

 

Leyla dîyar kerd ke senîn lajê xo ra zanayîş girewto, şîya ke cenaze bigîra û wina vat: "Ma o wext nêzanayîne ke cenaze berda şaristanêk bîn. Ma o wext gonîya ewil da. Dima ra ma reyna da. Yewin waştişê mi oyo ke cenazeya lajê xo bigîra."

 

‘Tu heqê înan çinbi bima wina bikerê'

 

Leyla dîyar kerd ke ganî mercîyê edlî no het ra bi merdimayî têbigeyrê û wina vat: "Demo ke zerrîya mi teng bena, ez şona serê gorê ciwanêk tîya dinyaya xo bedilnabi. Taybo zî boya mi hîra bena. Heqê tu kesî çin o bima wina bikero. 4 serrî yo seba esteyê lajê xo têkoşîn kena. Heta esteyê ey nêvînî rehetî mi rê çin a. Goristanan de bi desan cenaze estê. Tu dayîkî nê heq nêkenê. Ma zêde çîyêk nêwazenê."