ŞIRNEX - Santralê Termîkî yê aîdê Koma Cînerî ke mabêne bajarokê Gîte û Bêspinî de ameyê viraştiş de, cuya însanan kewena tehluke û welatîyê uca waştişê wedaritişê santralî kerdî.

 

Santralê Termîkî yê aîdê Koma Cînerî ke bi nêzdîbîyayîşê xo yê hukmatî yeno zanayene, qezaya Silopî ya Şirnexî de beno sebebê qirkerdişê xoza û cuya însanan tehdîd keno. Santral mabêne bajarokê Gîte û Bêspinî de ameyê viraştene.

 

Her di qilan de serra 2008 de heta nika xebate yena kerdene. Heta roja ewro xeylê darî ameyî birnayene û cuya ganeyan ameye çinkerdene. Roj bi roje wareyê xebate yeno hîrakerdene û xoza yena texrîpkerdene. Seba dînamîtê ke bêmabên wareyê madenî de yenê teqnayene û hewrê tozî benê sebebê tehlukeyan.

 

Santralê Termîkî ke mabêne di bajarokê qorîcîyan de ameyo awankerdene û derûdorê santralî zî bi qereqolê leşkerî ameyo abluqakerdene. Seba na rewşe welatîyê ke tîyayê nêeşkenê bi azad qisey bikerê. Pêwa gazê Santralê Termîkî zirar dano merdiman, dano nebatê derûdorê zî û xêrcê nînan zî varanê asît û welî daristanan, arazîyê ramitişî de varenê. Temamî tesîrê pêro cuye keno.

 

Welatîya bi nameyê Leyla A. bale ante serê Santralê Termîkî ke bajarok de ameyê viraştene û vat: “Dimayê viraştişê santralî xeylê kesî nêweş kewtî. Bax û baxçeyê ma zirar dî. Fêkî û sebzeyê ma xira bî. Tîya xeylê cinîyê diganeyî domanê înan vera înan şi. Cinî, doman, ciwan, kal û pîr heme nê santralî ra bi tesîr benê. Cuya ma mîyanê tehluke de ya. Jehrê nê santralî seba ke keweno mîyanê hawa, dewe, qeza û merkezî de vila beno. Tena ma ney, ê bînî zî zirar vînenê.”

 

‘Wa santralê termîkî betal bikerê’

 

Welatîyê/e ke nêwaşt nameyê xo vajo/a, vat ke seba santralî cuya înan binê tehluke de ya û vat: "Seba no santralî ma wazenê tîya ra bivejîyê. La hetêk ra zî seba ke herra ma tîya de ya, ma nêwazenê tîya ra fek vera bidê. Ma sere de nêwaşt ke no santralî viraznê û ma hemverê ci vejîyayî. Labelê waştişê ma bi ca nêardî. Nika zî seba nê santralî xeylê kesî merdî. Keyeyê ma de zî xeylê kesî merdî. Ma êdî nêzanê senîn bikerê. Wa nê Santralê Termîkî padê û betal bikerê.”