WAN - Hemsereka HDPyî Muşî Sîbele Genç dîyar kerd ke do bi ‘Ma xo pawenê' reyde Tirkîya de xeta micadeleyê hempar bi cinîyan dir awan bikerê û vat, kampanya goreyê prosesî hemleyêk girîng o.

 

TJAyî bi kampanyaya, ‘Ma xo pawenê' dir xeta micadeleyêk newe awan kerd û xo amade kenê ke cinîyan vejê kuçeyan. Xeylê şaristanî startê kampanya dayî û esasê kampanya ‘pawitişê cewherî yo.’ Hemsereka HDPyî Muşî Sîbele Genç derheqê kampanya de qisey kerdî.

 

'Cinîyê Kurdî wayîrê tecrubeyêk 40 serrî yê'

 

Sîbele dîyar kerd ke micadeleyê azadîya cinîyan de cayê cinîyê Kurdî girîng o û vat: "Wexto ke merdim micadeleyê demokrasî û heqê merdiman ewnîyenê, merdimî vînenê ke cinîyê Kurdî zaf aver ê. Cinîyê Kurdî wayîrê micadeleyêk 40 serrî yê. Zaf kede dayê. Seba destkewtişê xo bedelê pîl dayî. Micadeleyê cinîyan dimayê 1980 de herême de hîna pîl bi. Serrê 90an de bi HADEPyî dir wareyê sîyasetî de zêdeyêr ca girewtî. Seba aştî micadele û bedelê pîl dayî. No mîras her ke şino vila beno."

 

'Têkilîyê xurt awan kerdî'

 

Sîbele dîyar kerd ke hemverê faşîzmî de cinîyan her ca de vengê xo berz kerdî û vat: "Sebebê zêdebîyayîşê faşîzmî bi amancê bêvengkerdişê cinîyan o. Cinîyan seba destkewtişê xo bedelê pîl dayî. Hemverê faşîzmî topyekun xo ver dayî. Ameyîşê ma yê bi cinîyê Tirkîya dir newe yo la têkilîyê xurt ameyî awankerdene."

 

'Ma eşkenê paştdayîş xurt bikerê' 

 

Sîbele bale ante serê kampanya, ‘ma xo pawenê' û vat, hamleyêk girîng goreyê prosesî yo û wina vat: "Xopawitiş, çîyo tewr hewce yo. Seba pawitişê qezencan, beden, ziwan, nasname û cuya cinî, nê hewcedarî bî. Ganî ma xeylê kodê zîhnîyetê serdestî yê camêrdan cuya xo ra vejê. Ganî ma mîyanê hewldayîşê nasnameyêke newe de bê."

 

'Bi kampanya ma eşkenê ercê xo pîl bikerê' 

 

Sîbele tewr peyîn qiseykerdişê xo de bale ante serê girîngîyê mekanîzmayê pawitişê cewherî yê cinîyan û wina vat: "Bi nê hişmendî ganî ma wayîrê ziwan, beden, şexs, komel, tarîx û ercê cografya vejîyê. Ma erjê xo eşkenê bi kampanyaya, ‘ma xo pawenê' pîlêr bikerê.