AMED - Hîdayet Kiliçci ya ke qezaya Yenîşehîrî de 2 serrî yo karê tamîrê saetan kena va ke wexto ke newe dest bi nê karî kerda, kesê ke seba saetê xo tamîr bikerê peyser agêrayîne, la aye goş nêdayo tu kesî û karê xo dewam kerda.

 

Hîdayet Kilinçci (32) ya ke Yenîşehirê Amedî de hem tamîrê saetan kena û hem zî saetan roşena, dîyar kerd ke warê xebate de tu cîyayê cinî û camêrdan yewbînan rê çin o û veng da cinîyan: "Wa cinî xo ra bawer bê, goş nêdê tu kesî û heme wareyan de bixebityê. Cinî eşkenê pêro karî bikerê.”

 

‘Mi zanayîşê xo zêde kerd’

 

Hîdayete dîyar kerd ke kargehê mêrdeyê xo dewr girewto û va: “Tîya kargehê mêrdeyê mi bi. Mêrdeyê mi heqê nê karî de nêvejîyayîne û mi ey ra dewr girewt. Ez destpêk de zaf bi kelecan bîya. Westayêk bi ey zaf çî ramojna mi. Mi zî her wext çîyêk ey ramojnayîne, çîyê newe zêde kerdêne û mi xo aver berd. Wexto ke ez newe musaya mi xeylê rey destê xo birnayîne, hacetê tamîrî çend rey destê mi ra şîne. La mi goş nêda û mi karê xo dewam kerd.”

 

‘Wexto ke çimê înan ginayîne mi ro peyser agêrayîne’

 

Hîdayete bale ant serê nêzdîbîyayîşê merdiman û wina va: “Rojê ewil wexto ke saetê xo seba tamîr ardêne, çimê înan ginayîne mi ro û bi endîşe têgeyrayîne. Vatêne ke ti do bieşkê  tamîr bikerê? Saete xo destê mi ra girewtêne û verê xo dayîne cayêk bîn. Seba ke nê karî sey karêk camêrdan dîne û bawer nêkerdêne ke cinîyêke bieşko karê tamîrê saetan bikero."

 

‘Cinî eşkenê heme karan bikerê’

 

Hîdayete tewr peyîn qiseykerdişê xo de veng da cinîyan û va: “Cinî eşkenê heme wareyan de bixebityê û her karî bikerê. Debara keyeyî ez kena, kredîyê keyeyî ez dana, pêwa nînan keye dir reyna ez eleqedar bena. Arayî, şamî, pakitî, dersê domanan, bi her çî dir ez eleqedar bena. Vengdayîşê mi seba cinîyan wa mûhtacê camêrdan nêbê û serê linganê xo de vinderê û bixebityê.”