Rojda Aydin

 

ŞIRNEX - Herême de cinî hema zî kulturê xo yê çulage dewam kenê. Dîndar Ekîncî, binê çadire de dezgehê çulage xo daya ro û lazimîyê keyeyê xo pê kena. Dîndare va ke pawitişê kulturî girîng o. Dîndare çîyê ke dayîka xo ra musaya, domananê xo rê musnena.

 

Pêwa averşîyayîşê teknolojî, reyna zî herême de hîn çîyê ke bi destan yenê viraştene, hetê cinîyan ra yenê pawitene. Cinîyê ke wazenê adetê xo yê keda destan dewam bikerê, nika hewl danê ke domananê xo rê ramojnê. Înan ra yew zî hunerê destan çulagî yo û bi taybetî cinîyê qezaya Hezexê Şirnexî de ciwîyenê bi çulagî dir eleqedar benê. Serê dezgehê çulagî de kilîm û turikan viraznenê. Dezgehê xo binê çadire de danê ro û dest bi viraştişê çîyan kenê.

 

‘Ez maya xo ra musaya’

 

Dîndar Ekîncî (40), dîyar kerd ke adetê verên bi her hawa danê ciwîyayîş. Dîndare viraştişê çulagî pîr û maya xo musaya û wina va: "Ma reyan layanê xo, xo bi xo viraznenê û reyan zî teber ra gênê. Ma dezgehê çulagî danê ro û dest bi viraştiş kenê. Çulagî ke ma viraznenê ma kenê tewre û xeylê çî. Ma domanê xo kenê tewran û danê paşta xo û verê xo danê zozanan. Sewbîna ma tewran viraznenê danê serê paşte heran û estoran zî.”

 

‘Karê ma zehmet o’

 

Dîndare qiseykerdişê xo de bale ante serê tewirê layan û va: "Ma her reng layan xebitnenê. Labelê layê çulage cîya yê. Coka merdim nêeşkeno bi her lay çulage virazno. Nê layê ke ma xebitnenê, ma vanê qeziq. Ma çulagêke mîyanê 3 û 4 rojan de qedênenê. Viraştişê çulagan zaf zehmet o. Wexto ke merdim virazneno mil, paşt û destê merdimî zaf dejeno.”

 

‘Ez nika domananê xo rê musnena’

 

Dîndare, dîyar kerd ke ganî wayîrê kulturê xo vejîyê û va: "No kultur maye û pîranê ma ra mendo. Ma zaf kulturê xo ra hes kenê. Ma cinî wayîrê kulturê xo vejênê. Ma nêwazenê ke kultur û adetê ma vinî bibê. Bi nêzdîyê 15 serrî yo ma çulagan viraznenê. Xêrcê viraştişê çulagan ez papik, kazax û xeylê çî bînan zî viraznena. Ez nê çulaganê ke viraznena nêroşena. Tena seba keyeyê viraznena.”