MÊRDÎN - Hemsereka Partîya Demokratîke ya Şaran (HDP) ya Mêrdînî Perîhan Agaoglu ya ke menga Adare ra tepişte ya hema zî îdanameyê derheqê aye de nêameyo amadekerdene û no prosesê tehqîqatî verê destê  2 dozgeran de ameyo vurnayene.

 

Hemsereka Partîya Demokratîke ya Şaran (HDP) ya Mêrdînî Perîhan Agaoglu 29ê Sibata 2019 de Mêrdîn de ameye destbendkerdene û 6ê Adare de zî ameye tepiştene. 21ê Adare de bi sebebê îfadeyê şahidanê nimte, surgunê zîndanê tîpê T yê Rihayî ameye kerdene. Pêwa hende wext derbaz bi, bi sebebê tehqîqat dewam keno, îdianameyê derheqê aye de nêameyo amadekerdene.

 

'Bi îfadeyê nimte ameya tepiştene'

 

Hemsereka Partîya Demokratîke ya Şaran (HDP) ya Mêrdînî Perîhane Agaoglu bi îfadeyê şahidê nimte ra ameye tepiştene. Perîhana ke zîndanê Mêrdînî ya tîpê E yî de manena, 21ê Adare de zî surgunê zîndanê Rihayî yê tîpê T ameya kerdene. Pêroyî de 7 mengî yo tepişte ya. La hema yeno vatene ke tehqîqat dewam keno û îdanameyê derheqê Perîhane de nêameyo amadekerdene. Sewbîna ame vatene ke Perîhane zîndan de xeylê rey rastê tehdîdan ameya. Kitab, mektubî zî tepişteyan rê nînê dayene û heqê xo yê weşîye ra ameyê durfistene.

 

Goreyê zanayîşê ke ma avûkatan ra girewt, dosya ke 7 mengî yo dewam kena 2 dozgerî vurnayê. Dozgerîyê yewin vatib, “Dosya de kêmî estê" û dozgereyî diyîn zî vato, “Ganî ma pêro zanayîşan arê bidê" coka hema zî îdaname nêameyo amadekerdene.

 

Do îdaname key bêro amadekerdene nîno zanayene.