![](/staticfiles/news/150135/2020/11/03/823x463cc-03-11-20-amed-qeyrana-abori-kolan-rop-remziye-durup-manset.jpg)
'Gama ke ma çîyêk gênê di rey fikirîyenê'
- 14:04 3 Teşrîna peyêne 2020
- NAROJANE
AMED - Krîzê ekonomî ke her ke şino kûr beno, welatî ci ra gerrekerdox ê. Amedî reaksîyon vera polîtîkayê ekonomî dayî û vatî: "Ma nêeşkenê lazimîyê xo bingehîn bi ca bîyarê. Wexto ke çîyêk ma gênê ma di rey fikirîyenê. Senîn selahîyetdarê dewlete vanê, rewşa ekonomîye baş a!"
Gerreyê sereke yê welatîyan krîzê ekonomî yo. Krîzê ekonomî bi pandemî dir hîna kûr bi. Bi padayîşê kargehan dir xeylê kesî bêkar mendî yan zî kar ra ameyî eştene. Bêkarî û vayîye nika problemê komelî tewr pîlî ya. Vatişê selahîyetdarê dewlete yê derheqê başbîyayîşê ekonomî bî sebebê reaksîyonê welatîyan. Amedijî hemverê polîtîkayê ekonomî û krîzê ekonomî ser o fikrê xo ajansê ma rê qal kerdî.
'Wexto ke ma çîyêk gênê ma di rey fikirîyenê'
Wendekare Pelda Saman dîyar kerd ke polîtîkayê ekonomîye ya dewlete baş nîyê û va: "Krîzê ekonomîye sey her kesî serê ma de zî tesîrêk negatîf ard meydan. Kesê ke vanê serê ma de tesîr nêkerdo zî zerrî ra nîyê. Wexto ke ma çîyêk bigîrê, di rey fikirîyenê. Eke ma di rey fikirîyenê o wext eşkerayo ke krîzêk pîl esto. tiştekî bikirin em du caran difikirin. Qimetê TL êdî nêmendo. O zî beno sebeb ke vayîya çîyan serê ma de tesîr bikero. Verê ra ma bi pereyêk kêm xeylêk çî girewtêne, la ma nika nêeşkenê lazimîyê xo yê rojane bi ca bîyarê. Polîtîkayê dewlete yê ekonomîye baş nîyê. TL ewro tena hemverê dolarî ney, pereyê bîn yê xerîb ra zî qîmetê xo vinî kerdo."
'Dewlete umîdê vengan dana'
Derya Tektaşa ke dimayê pandemî bêkar menda wina qisey kerd: "Ma verê tay bo zî lazimîyê xo bi ca ardêne. La nika tu çîyêk ma nêeşkenê bigîrê. Domanê mi şinê mektebe, la ê zî tengasî de yê. Verê pandemî ez karê xo de bîya, la seba pandemî û krîzî ez nika bêkar menda. Ma wazenê nê krîzî rê çareyêk bêro vînayene. Seba ke raştî de ma kewtê rewşêka perîşan. Dewlete her wext umîdê vengan dana ma. Tena fatura û kîra de ney, zam her çî de esto."
'Dewlete hetkarî nêkena tena qisey kena'
Remzîye Durup bale ant serê rewşa xo ya ekonomîye û wina va: "26 serrî yo ke mêrdeyê mi rehmet kerdo. Coka ez tena bi sereyê xo ya û debara keyeyê xo kena. Verê ez tekstîl de xebityayîne, la seba pandemî kar ra vejîyaya. Seba reyke bîn bixebityî mi muracatê karî kerd la cewab nêame. Ez nêzana ez o nê krîzî de çi karî bikerî. Dewlete tu hetkarî nêkena. Krîzêk zaf pîl esto, ma qasê xo nêeşkenê nan biwerê. Ma xo rê şaş bîyê."
'Vayîyê sebzeyan sey adir o'
Defîn Kaya zî dîyar kerd ke nêeşkenê êdî fatureyan bidê û va: "Eke ma çîyêk bigîrê ma nêeşkenê çîyêk bîn bigîrê. Ma hema lazimîyê xo nêeşkenê bi ca bîyarê. Wexto ke ma faturayanê xo nêdê yenê ceyran û awa ma birnenê. Bi no hawa ma kewenê tengasî. Xora bazar de zî ma nêeşkenê heme çî bigîrê. Seba ke vayîya sebzeyan sey adirî ya. Ma nêzanê ma do se bikerê."