ENQERE - Vervatoxa HDPyî Ebrû Gunay derheqê nêzdbîyayîşî îqtîdarî rexne kerd û va ke, “Heta ke problemê Kurdan nêro çareserkerdene, tu yew sîyasetê reformî serkewte nêbo. Çîyo ke tewr baş seba înan oyo ke ca de îstîfa bikerê û nêbê belayê sereyê welatî.”

 

Vervatoxa HDPyî Ebrû Gunay bînaya Merkezê HDPyî de kombîyayîşêkê çapemenîye kerd û rojdem ercna. Ebrûye vera operasyonanê qirkerdişê sîyasî yê ewroyînî nêrazîbîyayîşê xo mojna.

 

‘Şima huqûq qetil kerdo’

 

Ebrûye vist vîrî ke operasyonan de avûkatî û endamê Heyetê Rûmetî yê Yewîya Doktoran ê Tirkan (TTB) Şeyhmus Gokalp zî tede doktorî ameyî destbendkerdene û vat: ''Key qala reformê huqûq û edaletî yena kerdene bêhuqûqîyî zêdîyenê. Avûkatî seba îfade nêameyî vengdayene û serê sibayî polîsan eşt keyeyanê înan ser. No mîsal mojneno ke hukmkerdiş senî bîyo keyfî. Hînî komel mexapînê, Şiam her roje edalet û huqûq qetil kenê. Avûkatî cade vera bidê.”

 

‘Vatişê reformî xapînayîş o’

 

Ebrûye dewamê qiseykerdişî de wina va: “Îqtîdarê AKPyî pêro îqtîdarê xo de wina kerd. Hînî vatişê ci kelecan nêdanê çewî. Vatişê reformî xapînayîş o. Kemal Kurkut verê çimanê ma de kişîya la derheqê kiştoxê ci de bira  veradayîşî dîyaye.

 

‘Cinî do meydanan de bê’

 

Ebrû va ke şîdetê serê cinîyan zêdeyêr bîyo û va: “Sûcanê vera cinîyan de zî polîtîkaya bêcezaveradayîşî yena caardene. Hînî no bîyo sîstematîk. La têkoşîno hempar ê cinîyan, paştdayîşê cinîyan û îtîfaqê cinîyan vera şîdetê camêrdan 25ê Teşrîna Peyêne de do meydanan de bibê. Ez tîya ra selam kena têkoşînê cinîyan.”

 

‘Talankerdişê cayê tarîxan vindarnê”

 

Ebrûye bale ant serê Rojawanî û va: “Komê cîhadîstî erdê Rojawanî de seke makîneya sûcî yê.  Nê komî cinî û domanan rê îşkence kenê, çimeyanê herême talan kenê û her roje bi sûcêkê bînî dekewenê rojdem. Hînî wa no talan biqedo. Seba ke şarê Rojawanî abigêro wareyê xo ganî astengîyî bêrê wedaritene.”