WAN - TJA do 25'ê Teşrîna Peyêne de Wan de rayrayîşêk organîze bikero û cinîyan vengdayîşê tewrbîyayîşê rayrayîşî kerdî û vatî: "Semedê Îpeke Er û Gulistane Dokû vejîyê meydanan.”

 

Xeylêk şaristanê herême Tevgerê Cinîyê Azad (TJA) xebatê 25'ê Teşrîna Peyêne rayrayîş kenê. Çarçewaya 25'ê teşrîna peyêne de bernameyê tewir bi tewir yenê organîzekerdene. 25ê teşrîna peyêne de Wan de bi rayrayîşêk fînal kenê. Rayrayîşê cinîyan do Beşyolî saete 12 de destpê bikero û heta verê awanîya Rêxistina Partîya Demokratîke ya Şaran (HDP) ya şaristanî dewam bikero. Cinîyan vengdayîşê tewrbîyayîşê rayrayîşî kerd.

 

Hemşaredara Bêgireyê Wanî ya ke vera ci qeyûm amebi tayînkerdene Leyla Balkan, dîyar kerd ke 18ê teşrîna verêne de kampanyaya “Ma xo pawenê” dabî destpêkerdene û va: “Ma xebatanê xo çarçewaya kampanya de dewam kenê. Verê nê de zî ma xebatanê 25ê teşrîna peyêne zî kenê. Ma veng danê pêro cinîyan ke hemverê polîtîkayê şer yê taybetî yê dewlete bêveng nêmanê. Ma vanê seba Îpeke Er û Gulistane Doku vejîyê meydanan. Hemverê qirkerdişê cinî û şîdetê hemverê cinî bêveng nêmanê. Ma do bi her hawa têkoşînê xo dewam bikerê. Cinî pîya bi hêz ê, gama ke ma bibê yew ma eşkenê hemverê kiştiş tecawuz û tacizî têkoşîn bikerê.”

 

Hemserak HDPyî ya qezaya Rayîrê Armûşî Canan Uzunay zî qiseykerdişê xo de vengdayîşê tewrê rayrayîşî kerd û va: "Her roje kiştişê cinîyan dewam keno. Êdî ma nêwazenê cinîyêk bêro kiştene. Cinî her wext hetê camêrd-dewlete ra yena kiştene. Tena sebebêk esto no zî seba polîtîkayê dewlete bi ca yenê. Seba ke xeylêk serebûtî bêceza manenê. Ma seba faîlê Gulistane Doku û Îpeke Er bêrê muhakemekerdene, ma do wareyan de kom bê. Ez veng dana cinîyanê Wanî ke tewrê rayrayîşî bibê.”