COLEMÊRG - Gevero ke menga çele derg dewam keno SYDVyî "30 torbe komir" dayî keyeyan. Xiyale Bor derheqê komiro ame vilakerdene de va, "Tenê 30 torbe komir dayê ma û o zî komir ney kerra vejîya.”

 

Geverê Colemêrgî de taxa Ormanî de hetê Weqfê Hetkarî û paştdayîşê komelî (SYDV) ke girêdayê Walîtîya Colemêrgî ra hîn keyeyan rê komir ame vilakerdene. Keyeyê ke komir girewtî dîyar kerdî ke torbeyê komirî de kerra estê.

 

‘Vera komirî kerrayî vejîyayî’

 

Welatija Taxa Ormanî Xiyale Bor derheqê komirî de wina va: "Seba ke rewşa ma ya ekonomî destûr nêdana, ma nêeşkenê seba xo kolî û komir bigîrê. Torbeyê dewlete ra zî komir ney kerrayî vejîyenê. Tîya çele 6 mengî dewam keno. Tena 30 torbe komir dayê ma û ê zî pêro kerra yê. Eke komî de bîyarê pêser tena torbeyêk komir vejîyeno. Tena lajêk mi xebityeno û yê bînî zîndan de yê. Lajê min o ke xebityeno 3 domanê ci estê. Meaşêk gêno û hewl dano ke hem ma û hem zî domananê xo wey bikero. Eke ekonomîya ma destûr bidayîne, vera çadire keyeyê ma bibayîne. Ma nêeşkenê komirêk dayê ma ma biveşnê û ma nêeşkenê arûdû bigîrê. Ma Gevero ke çele ci de xidar derbaz beno mîyanê serdî de mendî.”

 

‘Boya ci zaf xirab a’

 

Semra Işik zî reaksîyonê xo wina va: "30 torbe komir qîmê 6 mengî çele nêkeno. Ma roje de nêzdîyê 2 torbe komir veşnenê. 30 torbe komiro ke dewlete dayo qîmê ma nêkeno. Serra vîyarte de zî komirê ke dabî ma heme kerra bî û ma eşt. Mêrdeyê mi heta hamnanî seba ke pereyê komir û kolîyê ma kerdî xebityayî. Na serra zî komirê ke dayê tena dûman o û boyêk xirab esto. Ma soba pirr kenê la soba zî pê germ nêbeno."

 

‘Ma zimistanî yenê mexdûrkerdene’

 

Halîme Bor zî wina va, "Dewlete 30 torbe komir dana la qîmê ma nêkeno û ma orteyê zimistanî mexdûr benê. Komirê ke dano zî seba ke komir danê zî seba ke kerra germ zî nêkeno. Tena boye û dûman vila keno. Ma vanê ekonomîya ma destûr nêdano ke ma xo rê komir bigîrê wa komirê baş bidê ma.”