MEXMÛR - Dayîkê dengbej yê Koma Meryemxan ê Mexmurî derheqê hêrişê dewleta tirkî yê bi hemkarîya PDKyî ser Wargehê Mexmûr û hem zî bi proyî yê Kurdistanî de şîrove kerdî û vatî: “Ma qetî hemverê dişminê xidar de sere nêtewêna û ma qetî zî nêtewênenê.”

 

Dayîkê dengbej yê Koma Meryemxan ê Wargehê Penaberan ê Şehîd Rûstem Cudî ( Mexmûr) derheqê hêrişê dewleta tirkî yê bi hemkarîya PDKyî ser Wargehê Mexmûr û bi pêroyî serê Kurdistanî de ercnayîşê xo ajansê ma de ardî ziwan.

 

‘Dewleta tirkî başûr ray bena’

 

Dayîka bi nameyê Eminê Şaxî wina va: “Ê hêrişê ke yenê kerdene, serê temamê şarê Kurdî yenê kerdene. Kesê ke kurd ê hêriş bi înan yeno kerdene. Başûrê Kurdistanî de 1992 ra heta nika baregehê dewleta tirkî estê, la ê serrê peyîn her ke şino hêzê xo zêde kenê û hêrişê qampanê Gerillayan kenê. Vera îdarekarê Kurdistanî, dewleta tirkî başûrê Kurdistanî ray bena. Ganî Hukmatê başurê Kurdistanî bixo, Başur ray bero. Hemverê hende kiştiş û hêrişan pêro kesî bêveng ê. Kurd heme wazenê ke pîya cuyek weş biciwîyê. La dişmino xidar nêwazeno kurdî pîya cuyêka weş biciwîyê. Selahîyetdarê hukmayî hetkarîyê dişminî kenê. Cayê ke kurdan kêfweş bikerê, zerrîya dişminî weş kenê.”

 

‘Meyerê kayê lêşin ê dişminî’ 

 

Dayîka Eminê Şaxî zî veng da şarê kurdî û wina va: “Ma qetî hemverê dişmino xidar sere nêtewêne û ma qetî nêtewênenê. Lazim o heme kurdî bibê yew û hemverê dişminî xo ver bidê, nêrê kayan.”

 

‘Sivîlan qetil kenê’

 

Dayîka bi nameyê Fehime Şirnexî zî qalê hedef û amancê dewleta tirkî kerd û va: “Hedef û amancê dewleta tirkî tena PKK nîyo, çinkerdişê temamê destkewtişê kurdan o. Senîn ke dişmino xidar hêrişê rojawanê Kurdistanî kerd û bi hezaran cinî û domanê kurdî qetil kerdî, ewro zî bi keyeyê Barzanijan hêrişê başurê Kurdistanî keno, wazeno ke pêro şaristanan bi dest bikero. Bi sebebê bîyayîşê PKKyî şarê sivîl qetil kenê. Ganî ma bibê yew û pîya problemanê xo bi rayîrê diyalogî çareser bikerê.”