Medya Uren

 

MÊRDÎN - Çalekgera TJAyî Gulîzar Îpek derheqê dewamkerdişê kampanya "Ma xo pawenê" vat: "Senî ma serra 2020 kerd serra serewedaritişê cinîyan, ma do emsar zî vera tecrîdî sere wedarinê. Ma cinî tecrîd qbul nêkenê û ma do bi rêxistinêk xurt tecrîd biqedênê. Seba ke çareserî îmralî yo."

 

Tevgerê Cinîyê Azadî (TJA) 15ê Êlûle 2020î de, hemverê tecrîdî yê Îmralî, desteştiş, tecawuz, qirkerdişê  sîyasî û hêrişê serê ziwanê dayîke startê kampanya “Ma xo pawenê" dabi. Prosesê kampanya ke 4 mengan dewam kerd de TJAyî  çalekîyê tewir bi tewir viraşt û serra 2021 de zî qerarê dewamkerdişê kampanya da. Çalekgera TJAyî  Gulîzar Îpek derheqê dewam kerdişê kampanya de ajansê ma rê qisey kerd.

 

'Ma vera hêrişan serewedaritişê xo berz kerd'

 

Gulîzare sere bale ant serê prosesê kampanya û va: "Ma vera tecrîd, desteştiş, tecawuz, qirkerdişê sîyasî û hêrişê serê şaran kampanyaya "Ma xo pawenê" da destpêkerdene ke tam wextê ci bi. Çiqas nê prosesî de polîtîkayê hêrişê taybet zêde bî zî hemverê înan ma rêxistinbîyayîşê xo bi hêz kerd. Ma netîceyê serkewtişî zî bi dest kerd. Ma do emsar zî bi heme hêzê xo têkoşînê xo bikerê û bêguman ma do serkewte bibê."

 

'Babeta ma ya emsar tecrîd a'

 

Gulîzare dewam de wina va: "Bi serran o m ahemverê tecrîdo girankerde serê Brez Abdullah Ocalanî de yo têkoşîn kenê. Seba ke tecrîd bêro wedaritene û aştîyêk mende bêro averşîyayîş hewildanêk pîl esto. Ma zanê ke tecrîd tewr zêde serê cinîyan de keno û lazim o cinî rêza vernî de vera tecrîdî reaksîyon ramojnê. Seba nê zî dewamê kampanya xo de ma do girîngî bidê serê wedaritişê tecrîdî."

 

'Lazim o her kes bibo vengê tepişteyan'

 

Gulîzare vat ganî herkes bibo vengê tepişteyan û va: "Seba heqê demokratikî ganî m apîya sere wedarinê. Ma paştdayîş bidê tepişteyan û bibê vengê înan. Çi destê ma ra yeno ma do bikerê. Ma do xo reyna biresnê pêro komelî û cinîyan. Tecrîd serê heme komelî de yo û serê heme cinîyan de yo. Seba komeleyêk demokratîk ganî ma vajê bes o. Seba çareserî tecrîd bêro wedaritiş. Seba ke kilîtê çareserî îmralî de yo."

 

'Ganî ma cinî wareyan de bê'

 

Gulîzare tewr peyîn wina va: "Nê deman de faşizm sewîyeya tewr cor de yo. Ganî ma serê lingan de bê. Seba ke ma tecrîd bişikinê û faşîzm birijnê, ganî ma pêro rêxistinê cinîyan wirzê serê lingan. Ma vînenê ke sîstem çiqas hemverê serewedaritişê cinîyan bi reaksîyon o. Ganî ma bi îradeyêk xurt wareyan de bê û vera tecrîdî têkoşîn bikerê."