Sema Çaglak 

 

AMED - Metal Kollektîf ke bi komêkê cinîyan dir amebi awankerdiş, pêşengehê xo yê diyîne ke cuya Mûsa Anter qal keno, siba akenê. Hedîye Yaşar ke kollektîf de ca gêna, vengdayîşê tewrbîyayîşî kerd û vat: "Ma do berardişê ke 7 mengan hetê 5 atolyeyan ra ameyê viraştiş, vejê vernîya hunerheskerdoxan."

 

Metal Kollektîf serra 2018 de hetê komêkê cinîyan ra ame awankerdiş. Metal Kollektîf roja ke ame awankerdiş heta nika hetê hunerî de xeylêk xebatê cîya pêşkêş kerd. Metal Kollektîf dimayê pêşengehê “Cinî û koçberî” nika amadekarîya pêşengehê newe keno. Pêşengeh do siba eywana pêşengehê Tîyatroyê Bajêrê Amedî de bêro pêşkêşkerdiş. Pêşengeh de cuya Mûsa Anterî ameyo destgirewtiş. Derheqê pêşengehî de Hedîye Yaşar ke Metal Kollektîfî de ca gêna ajansê ma rê qisey kerd.

 

Hedîye destpêkê qiseykerdişê xo de serê amanc û xebatê Metal Kollektîfî de qisey kerd û vat: "Kollektîfê ma bi  38 cinîyan dir dest pêkerdibi. Labelê her wext na hûmare vurya. Reyan zêde bî, reyan zî kêm bî. Projeyê 'Cinî û koçberî' de xeylêk wareyê cîya de ma xebatê xo kerdî. Ma xeylê xebatanê xo wareyê sanayîyê  metalî viraşt. Semedê nê ma nameyê kollektîfê xo kerd metal. Sewbîna ma xeylêk mana danê nesneyan.”

 

'Pêro xebatî hetê cinîyan ra ameyî viraştiş'

 

Hedîye, dîyar kerd ke xebatê pêşengehê înan hema zî dewam keno û vat: "Ma semedê pêşengehî muracatê, 'Wareyê semedê kulturî' kerd û ma waştişê hetkarîya ekonomî kerd. Ma mîyanê 7 mengan de xebata 5 atolyeyan kerd. Serê wareyê resim, heykel, polyester û hunerê neweyî de atolyeyan viraşt. Netîceyê nê xebatê atolyeyan de bererdişê ke vejîyayî ma do siba pêşangeh de pêşkêş bikerê. Pêşengehê ma do heta 26ê teşrîna verênde dewam bikero."

 

'Babeta pêşengehê ma derheqê Mûsa Anterî de ya'

 

Hedîye dewam de wina vat: "Temayê ma yê pêşengehî Mûsa Anter o. Pêşengeh derheqê cuya Mûsa Anterî de ya. Semedê Mûsa Anterî her çî bi mana û girîn bi û semedê ey merdimî bi rûmet bî. Çîyê ke Kurdî ciwîyayîne dîne û hemverê tedayan vejîyayîne. Bi hîsê merdiman nêzdîyê çîyan bîne. Ez nê nêzdîbîyayîşî ra xeylêlk bi tesîr bîya. Xebatê ma yê serê na babete de rastî zî xeylêk zor û hessas bi. Babeta pêşengehê cinî û koçberî zî semedê ma xeylêk zor bi."

 

'Ma do siba pabeyê şima bê' 

 

Hedîye tewr peyîn wina vat: "Semedo ke huner biresnê komel ma her wext mîyanê hewldayîşî de bî. Nê kollektîfî de cinî xo vînenê. Semedê haydarbîyayîşê komelî, semedê vurnayîşî ma na xebate kerd. Goreyê ma vurnayîşê cinî, vurnayîşê komel û cuye yo. Ma do siba pabeyê şima bê û bêrê serdayîşê pêşengehê ma."