Şehrîban Aslan

 

AMED - Avûkata, aktîvîsta TJAyî Zelal Bîlgîn ke dewa ci rê amebî akerdiş, 9 serrî ceza ci rê ameya dayîş, Sîdar Gumuş wina vat: “Îstînafî vernîya dadgehe qerar bido, qerar dayo. Îtîrazê ma verê çiman de nêameyo girewtiş û cumleyê kalib qerarêk îstînafî ameyo dayîş."

 

Aktîvîsta Tevgerê Cinîyan ê Azad (TJA) Zelal Bîlgîn çarçewaya cipersayîşê serdozgerîya Komare ya Amedî daya destpêkerdiş de 5ê nîsana 2021 de ameye destbendkerdiş û tepiştiş. Dewaya Zelal Bîlgîn ke 4in Dadgeha Cezaya Giran ya Amedî de ameyîne vînayîş, 23ê êlule 2021 de qerarê ci ame dayîş û 9 serrî ceza Zelale rê ame dayîş. Heyetê dadgehe cezaya bi îdiayê ‘endamîya rêxistine’ da, hukmê vistişê ceza zî bica nêardî.

 

Qerar bi zafrayî ame girewtiş û şertê muxalefetê endamêke kewt qerar. Endamê heyetî şerhê xo de ard vîr ke dewaya Zelale bi îdiayê ‘endamîya rêxistine’ ra hîrê dosya ameyê têhet û îdia kerd ke  sûcê endamîya rêxistine sûcê temadî yo û vat, ganî Zelale hîrê rey endamîya rêxistine ra bêro cezakerdiş.

 

Îstînafê muracat red kerd

 

Avûkatanê Zelale qerar berdî îstînaf û îtîraz kerdî. Îtîrazê avûkatan ser o, Diyîn Daîreyê Dadgeha Edliyeyê Herêmî ya Amedî, dîyar kerd ke heme belgeyî cigêrayîş kerdê. Dadgehe dîyar kerd qeraro ke dadgeha herêmî daya, xo sepernena delîlê baş û huqûqî.

 

Avûkat Sîdar Gumuş derheqê qeraro ameyo dayîş de ercnayîş kerd û vat dimayê ke dosya şî îstînafî, mîyanê 30 rojî de qerar ameyo dayîş û vat: "Dadgeha îstînafî dosya sereyîn ê Zelale yanî dosya KCDyî bi 4 dosyayê bîn dir kerdo yew. Seba 5 dosyayan no qerar ameyo dayîş. No qerarêk normal nîyo. Coka ma vanêke  dosya nêwendê û qerar dayê. Goreyê madeyê 217/1 ê CMHKî dadgehe de nîno munaqeşekerdiş  û cipersayîşêk hukm esas nîno girewtiş."

 

‘Bêsebeb red kerd’

 

Sîdarî vat ke destpêkê muhakemekerdişî heta peynî eke waştiş bi ca biameyîne do xeylêk delîl û sûcdarî biameyîne pûçkerdiş û vat: "La dadgehe bê sebeb heme waştişî red kerdî. Delîlê sey îfadeyê şahidê nimite esas girewtî. No hetê huqûqî û mantiqî de nêeşkeno bêro qebûlkerdiş. Ma vat, do îstînaf nê xira bikero. La dadgeha îstînafî heme waştişê ma peygoş kerd û red kerd. Ma do nika dosya şêrê dadgerî. Îstînafî qerarê ke da huqûq qetil kerd."