RIHA - Keyeyê Şenyaşarî  312 rojî yo têkoşînê xo yê edaletî domnenê, Serdozgerîya Komare ya Rihayî ra wina vat: "Vera ke şima prensîbê huqûqî ca bîyarê,  şima talîmatê îqtîdarî caanê. Heme sûc do serê milê şima de bimano."

 

Çalakîya Nobeta Edaletî yê keyeyê Şenyaşarî yê verê Edlîyeyê Rihayî roja 312ine de dewam kena. Emîne Şenyaşar û lajê aye Ferît Şenyaşar,  keyeyê xo yê qezaya Pirsûsî ra ameyî vernî edlîye û meydano sey 'Quncikê Edaletî yê keyeyê Şenyaşarî'  dest bi nobeta xo kerd.

 

Keyeyê Şenyaşarî, têkilîyê nobeta xo ya edaletî ke bêmabên domnenê de ewro serê hesabê xo yê Medyaya Dîjîtale ra hesabê Serdozgerê Komare ya Rihayî Onder Yenîçerî etîket kerd û no mesaj vila kerd: "Serdozger Onder Yenîçerî  û ekîbê ey vera ke prensîbê huqûqî ca bîyarê talîmatê îqtîdarî anê ca. Heme sûc do serê milanê şima de bimano. Kesê ewro talîmat danê şima, do siba vajê  'la şima ma ra persa'."