Roda Aydin

 

ŞIRNEX - Cinîyê Botonijî ardî ziwan ke şexsê Aysel Tûglûk de hemverê tepişteyê nêweşan de zilm yeno kerdiş û wina vat: “ATK qerarêk sîyasî dano. Ganî Aysel Tûglûk bêro veradayîş. Aye tena siyasetmedar nîya, sewbîna îradeyê komelîya zî. Heta ke Aysel û tepişteyê bîn yê nêweşî bêrê veradayîş, do têkoşînê ma dewam bikero."

 

Zîndanê Tirkîya û herême de rewşa tepişteyê nêweşî roj bi roje giran beno. Zîndan de tepişteyê ke rewşa înan giran bena nîna dermankerdiş û bi merdişî dir rî bi rî yenê verdayîş. Hetêk bîn ra zî seba tepişteyê nêweşan hukmat tu çîyêk nêkeno û bêvengîya xo dewam keno. Nê tepişteyê nêweşan ra yew zî sîyasetmedara Kurde Aysel Tugluk ke serra 2016 de zîndanê Tîpê F yê Hûmara Yewî yê Kandirayî de tepişte ya. Sewbîna yeno zanayîş ke Aysele problemê giran ciwîyena û nêeşkena bi tena sereyê xo lazimîyê xo bi ca bîyaro. Derheqê rewşa Aysele de raporê “nêeşkena zîndan de bimano” ame dayîş la Sazgehê Tipê Edlî (ATK) zî eksê ci nê qerar da û nêverdeno ke Aysele bêro tahliyekerdiş.

 

Her ca de cinî bale ancenê serê rewşa weşîya Aysele û vengdayîşê tehlîye kenê. Cinîyê Botanijî zî seba Aysele veng da ke seba serbest bêrê veradayîş.

 

'Serê tepişteyan de hêrişêk xidar esto'

 

Hemsereka Partîya Demokratîke ya Şaran (HDP) ya Şirnexî Sabûha Akdag, dîyar kerd ke serê tepişteyan de hêrişêk xidar esto û vat: "Embazê ma yê  tepişteyî mîyanê çar dêsan de yê. Bi tacîz, îşkence û tedayan dir rî bi rî manenê. Ma hemverê îşkence û binpaykerdişê heqê tepişteyan bêveng nêmanenê. Ganî ma zilmê serê tepişteyan û bi taybetî yê serê tepişteyê nêweşan  bi  têkoşînê xo peynî bikerê. Ganî lezkî tepişteyê nêweşî bêrê veradayîş. Roj bi roje rewşa tepişteyê nêweşan giran beno. Semedo ke nê embazî ma yê tepişteyî kurd ê, xo ver danê nê hêriş û zilm înan rê yeno kerdiş. Dewlete bi hawayêke kêyfî têgêrena û goş nêdana tepişteyê nêweşan. No zilm tena serê tepişteyan de yeno kerdiş, eynî wextî de serê heme şarê kurdî de yeno kerdiş."

 

‘Wa Aysel Tûglûk ganî bêro veradayîş'

 

Sabûha tewr peyîn wina vat: “Şarê Kurdî tena nika ney, her wext zulmî dir rî bi rî mendê. Şarê kurdî her wext vera zulmî xo ver dano. Vengdayîşê ma wezîrê dade rê oyo ke goş bidê tepişteyê nêweşan û ganî înan vera bidê. Ma nêwazenê embazê ma yê nêweşî zîndan de dinyaya xo bibedilnê. Ma wazenê Aysel Tûglûk û tepişteyê nêweşî bînî bêrê veradayîş. Heta embaze Aysel Tûglûk azad bibo, ma cinî xo ver bidê û vengê xo berz bikerê."

 

‘Tepişteyan mergî dir rî bi rî verdayê'

 

Endama Meclîsê Dayîkê Aştîyê Asya Tay zî waştişê veradayîşê Aysel Tûglûk kerd û wina vat: "Waştişê ma yê dayîkan oyo ke ganî  Aysel Tûglûk bêro veradayîş. Aysel Tûglûk cinîyêke sîyasetmedar a. Embaza Aysele nêweşîya xo ra pêro çîyan xo vîr ra kena. Nêeşkena bi tena serê xo lazimîyê xo bi ca bîyaro. Bi hetkarîya embazanê xo yê zîndanî lazimîyê xo bi ca ana. Ma wazenê ganî bêro veradayîş. Hukmatî çim û goşê xo pada yo. Tepişteyan bi merdişî dir rî bi rî verdayê. Ganî Aysel Tûglûk bêro veradayîş ke  tedawî bibo.”

 

‘Eke çîyêk bi Aysel Tûglûk bibo berpirsyar Erdogan o’

 

Nermiye Îverendî zî wina vat: “Aysel Tûglûk kesêka zaf girîng a. Ma wazenê ganî bêro veradayîş. Nêeşkena lazimîyê xo bi ca bîyaro. Heme çî kena xo vîr ra. Wa hukmat Aysel Tugluk û pêro nêweşan vera bido. Bi hezaran sey Aysel Tûglûk ewro zîndanan de yenê tepiştiş. Di tutê mi zî zîndan de nêweş ê û nînê veradayîş. Heta nika 8 cenazeyî zîndan ra vejîyayî.  Ma nêwezanê cenazeyî zîndan ra vejîyê. Sey ke  heyf tepişteyanê ma ra gênê. Eke çîyêk bi Aysel Tûglûk rê bibo berpirsyarê ci Erdogan o, hukmatê AKP û MHPyî yo. Bi hawayêke kêyfî vera nêdanê. Wa heme kurdî seba tepişteyê nêweşan wurzê serê lingan û dest bidê destê yewbînan." 

 

‘Ganî heme kesî vengê xo berz bikerê'

 

 Nafîye Kuçuk zî wina vat: "Tutê ma yê nêweşî zîndanan de yenê pûyayîş. Aysel Tûglûk zî bi çend serrî yo nêweş a û vera nêdayî. Kesê ke tîryakî xebitnenê, tacîz, tecawuz û şîdet kenê, yenê veradayîş. Seba ke ma kurd ê nê zulmî serê ma de kenê. Ma wazenê no zulm peynî bibo. Ma waştişê veradayîşê Aysele kenê û wazenê bêro tedawîkerdiş. Xeylêk tepişteyê nêweşî zîndanan de verê mergî de yê. Heta nika xeylêk cenazeyî vejîyayî. Ewro  hukmat tutanê ma kişeno. Zilm û îşkenceyêk pîl serê ma de yeno kerdiş. Hem Aysel Tûglûk û hem zî tepişteyê nêweşî vera nêdayî. Ganî tu kes bêveng nêmano û vengê xo berz bikero."