RIHA - Emîne Şenyaşara ke 'Nobeta Edaletî' roja  332ine de dewam kena, vat: "Gelo kes ma nêvîneno?" La heta ke lajê mi nêro veradayîşî ez do têkoşîna xo bidomnî. 

 

Nobeta Edaletî ya keyeyê Şenyaşarî ke 3 ferdê keyeyê înan hetê pawitoxan û merdimanê Parlementerê AKPyî yê  Rihayî  Îbrahîm Halîl Yildiz ra ameyê kiştişî roja 332ine de dewam kena. Emîne û lajê xo yo ke qirkerdişî ra bi  birîndarî xelesîya bî keyeyê xo yê Pirsûsî ra ameyî verê Edlîyeyê Rihayî, pankarto ke fotoxrafê merdimê înan ê ameyî qetilkerdiş ser o aleqnayî û dest bi nobete kerd.

 

‘Wa lajê mi zîndan ra vejîyo’

 

Emîne dîyar kerd ke a nizdiyê serrê ke yo nobeta xo, pêwa serdî û germî dewam kena û vat: "Gelo kes ma nêvîneno?" Emîne dîyar kerd ke seba lajê  aye yo tepişte bêro veradayîş nobete gêna û dewam kerd: "Tena nê seba lajê xo, seba heme tepişteyan edalet wazena. Keyeyê ma ra 3 kesî qetil kerdî, Ferît zî birîndar bî. Tena lajê mi eşto heps. No senîn edalet û wijdan o? Êdî bes o, wa lajê mi heps ra veradê!  Wazena verîyê mergê xo, lajê xo bivînî. Eke lajê mi veranêdê, wa ez verê edlîye de bimirî. Heta lajê mi bêro veradayîş ez o verê edlîye de bî."