ANQARA - Keyeyê Gulîstane Doku Meclîs de Hemsereka Pêroyîye ya HDPyî Pervîne Buldan reyde pêvînayîşêk kerd.

 

Wendekara Zanîngehê Munzurî Gulîstane Doku Dêrsim de 5ê çeleyê 2020î ra nata vînîbîyaye ya. Keyeyê Gulîstane Doku seba ke aqîbetê kênaya xo bimuso Dêrsim de 'Nobeta Edaletî' dabî destpêkerdene. Keyeyî bire daye ke Anqara de verê Meclîsî de çalakîya xo rê dewam bikero. Keye şewe resa Anqara. Keyeyî serê sibayî waşt verê Meclîsî de eşkerayîyêke bido la polîsan keyeyî rê mudaxele kerd û nêverda ke keye eşkerayîye bido. Keyeyê Gulîstane Doku vera polîsan nêrazîbîyayîşê xo mojna û kewt Meclîs.

 

Dadîya Gulîstane Bedrîye, babî Halît û waka ci Aygule Doku Grûba HDPyî zîyaret kerde û Hemsereka HDPyî Pervîne Buldan reyde pêvînayîşêk kerd. Serekwekîlê Grûba HDPyî Saruhan Oluç û Merale Daniş Beştaş zî tewrê pêvînayîşî bîyî.

 

Dadîye Bedrîye Doku pêvînayîş de bi kurmanckî qisey kerd û vat: ''Înan sanîye bi sanîye Gulîstana mi kişte. Merg emrê Homayî yo, gorê her kesî esto. Mergê ciwanan giran o. Çi yo ameyo ma ser.''

 

Aygule Doku nameyê keyeyî ser o dosyayêke daye HDPyî û waştişê înan ardî ziwan. Pêvînayîş de Pervîne Buldan zî îfade kerd ke ê tim hetê keyeyê Gulîstane Doku de yê.

 

Keyeyê Gulîstane pêvînayîşî ra dima do tewrê kombîyayîşê Grûba CHPyî bibo.