Arjîn Yuksekbag

 

ANQARA - Endama PMyî ya SYKPyî Çagla Ozgençturk, derheqê tayinkerdişê qeyûman de wina vat: "Tayînkerdişê qeyûmî yê hetê hukmatî ra yeno manaya çinhesibnayîşê îradeyê şarî. Eke ewro reyke bîn weçînayîş bibo, do hemşaredarê bîyaye ser bikewê.”

 

Bi talîmatê Wezaretê Karên Zereyî, hem semedê qezaya Esenyurtî ya Stenbolî û hem zî semedê şaredarîya Bajarê Pîlî ya Mêrdînî, Êlih û Xelfetî yê ke îdarekarîyê DEM Partî de qeyûm ameyî tayînkerdiş. Hemverê tayînkerdişê qeyûman, şar seranserê Kurdistan û Tirkîya de vejîya wareyan û reaksîyon vera qerarî mojna.

 

Endama Meclîsê Partîya Newe Awanbîyayîşî yê Sosyalîstî (SKYP) Çagla Ozgençturk derheqê babete de ajansê ma JINNEWSî rê qisey kerd.

 

Çagla Ozgençturk, destpêkê qiseykerdişê xo de wina vat: "Welatîjî semedê xizmet bêro dayîş û herême ra berpirsîyar xo rê weçînenê. Hemverê nê de partîya îqtîdarî vana 'Şima nêeşkenê weçînê, namzetê ma ser nêkewtî û ez o zî şaredarê ke şima weçîna, kar ra dûrî bifînî’. No çî hemverê demokrasî pê ame û metodêk antîdemokratik o. No yeno manaya xespkerdişê îradeyê şarî." 

 

'Metodo tewr demokratîk pêkerdişê bajarî'

 

Çagla Ozgençturk, dîyar kerd şaredarîyê ke bi DEMî pêkerdiş de bî zî hedef ameyî girewtiş û wina vat: "Nimûne Şaredarîya Esenyurtî ya. Semedo ke rêxistinê demokratîk, dînamîkê komelî, şarê cîya, bawerîyê cîya yê qeza û bajaran semedê îdarekarîyê herêmî pê kerdî. Caardişê pêkerdişê bajarî, metodo tewr demokratîk o."

 

'Heqê weçînayîşî yeno astengkerdiş'

 

Derheqê tayînkerdişê qeyûmî yê Şaredarîya Mêrdîn, Êlih û Xelfetî de zî Çagla Ozgençturk wina vat: "Tayînkerdişê qeyûman yeno manaya xespkerdişê îradeyê şarî, hedefgirewtişê polîtîkaya partîya sîyasî. Demokratîkbîyayîş ra şar terseno. Heqê weçînayîşê şarê kurdî yeno astengkerdiş.”

 

'Do têkoşînê cinîyan pîl bibo û dewam bikero’

 

Çagla Ozgençturk, wina qedêna: "Îqtîdar nê sebebî ra qeyûm tayînê Şaredarîya Êlihê kerd. Îqtîdar raste rast hêrişê destkewtişê cinîyan kerd, hewl dano ke cinîyan peyser verdo û sîyasetî ra dûr bikero. Labelê cinî zî tu wext hemverê hêrişan de nêvindenê û do fek waştişê têduştî, cuye û azadî vera nêdê. Têkoşîn do timî dewam bikero.”