Elfazî Toral

 

STENBOL - Cinîyan reaksîyon vera cezaya dardekerdişî ke hukmatê Îranî tepişteyanê sîyasî yê cinîyan rê birnayo, mojnayî û vatî: “Têkoşînê înan têkoşînê ma yo. Ganî her kes bibo vengê Werîşe Muradî û Pexşan Ezîzî.”

 

Aktîvîsta Têgêrayîşê Cinîyanê Azadan (TJA) Turkan Kocadag da zanayîş ke rejîmê Îranî hemverê şarê kurdî û cinîyanê kurdan de polîtîkayêke çinkerdişî keno û cezaya dardekerdişî yê Îranî bi serran o dewam keno. Turkan Kocabag wina vat: “Îran de kurdî, cinî bedenê xo danê werte û têkoşîn kenê. Ganî cezaya dardekerdişî û rejîmê zextwerdî werte ra bêrê wedaritiş.”

 

‘Têkoşînê înan ê ma yo’

 

Turkan Kocabag wina vat: “Jin jiyan azadî tena Kurdistan de nê, her cayê dinya de veng da.  Wendekara unîversîteya Îslamî Azad ê Tehranî Ahû Deryayî 2yê teşrîna peyêne de hemverê laçike çalakî pê ard. Ahû Deryayî unîversîte de cilê xo vetî û sîstem protesto kerd. Werîşe Muradî û Pexşan Ezîzî rê cezaya dardekerdişî ameye birnayîş. Na ceza cinîyan rê game peyser nêda eştiş. Ganî tu kes semedê fikrê xo nêro cezakerdiş. Ganî fikr û ewnîyayîşê sûcî nêro vînayîş. Cinîyan tu wext fek têkoşînî ra vera nêda. Têkoşînê ma yew o. Paştîdayîşî pîl keno û dano ciwîyayîş. Werîşe û Pexşan tena nîyê. Ma kîşte înan de nîyê. Têkoşînê înan têkoşînê ma yo.”

 

‘Cezaya dardekerdişî sûcê merdimayî ya’

 

Temsîlkara Meclîsê Cinîyan ê Kongreya Demokratîke ya Şaran (HDK) Arîfe Çinar zî wina vat: “Dewlete hêrişê cinîyê ke têkoşîn kenê û xo ver danê kena.  Yê zîhnîyetê serdest bilerznê cinî yê. Bîyayîşê têkoşînê cinîyan înan tersneno. No demêk derg o Îran de hemverê cinîyan, kurdan hêriş est o. Cezaya dardekerdişî hevalanê ma yê cinî ameya birnayîş sûcê merdimayî yo. Ganî pêro cinîyê dinya hemverê  cezaya Werîşe û Pexşane de ameyê birnayîş, wurzê lingan ser û bêveng nêmanê.”

 

‘Cezaya dardekerdişî nîna qebûlkerdiş’

 

Verfeka herêma 3ine ya DEM Partî Gulîstan Aydin zî wina qalî kerd: “Îran azadîya şaran destê înan ra gêno û rejîmê xo awan keno. Laçika Jîna Emînî kerdî sebeb û qetil kerdî. Badê qetilkerdişê aye serewedaritişêk pîl vejîya werte. Cezaya dardekerdişî û zextî badê nê zêde bî. Tewr peyîn zî Werîşe û Pexşane ameye birnayîş. No bi tu hawayî nîno qebûlkerdiş. Ganî her kes hemverê rejîmê Îranî de vengê xo berz bikerê. Ganî ma cinî, nê hêrişan rê bibê cewab.”