Pelşîn Çetînkaya

 

ÊLIH - Aktîvîsta TJAyî Ruken Zeryam Işik da zanayîş ke cinî bi bîyayîş û nasnameyê xo binê tedayî de yê, pêwa astengîyan xoverdayîşê xo dewam kenê û wina vat: “Ma semedê 25ê teşrîna peyêne xebatê pîlî kerdî. Do tîya ra tepîya zî xebatê ma dewam bikerê.”

 

Aktîvîsta  Têgêrayîşê Cinîyanê Azadan (TJA) Ruken Zeryam Işik, derheqê xebatanê 25ê Teşrîna Peyêne de qisey kerd û vat, ê do pêro wareyan de têkoşîn û xebata xo pîl bikerê.

 

‘Ma bi ‘Jin Jiyan Azadî’ vejîyayî meydanan’

 

Ruken Zeryam Işik dîyar kerd ke sey TJA 25ê Teşrîna Peyêne de bi sloganê "Hemverê şîdetê camêrdî yê dewlete de Jin Jiyan Azadî" vejîyayê meydanan û wina vat: “Vernîya rayîrşîyayîşê 25ê Teşrîna Peyêne, Amed de 5ê teşrîna peyêne de sey TJA ma deklerasyonê 25ê Teşrîna Peyêne da. Sebebê Amed de deklerasyon eşkerakerdiş, Narîne bî. Semedê dîyarîya Narîne, Amed de ame dayîş. Ma zanê ke no kewt rojeva pêro Tirkîya û Kurdistanî. Qetilkerdişê cinî û tutan vejîya sewîyeya tewr pîle. Hemverê destkewtişê cinîyan de hêrişê pîlî est ê. Ma zî vat, do no 25ê Teşrîna Peyêne sey yê verênan nêbo.”

 

‘Her cayî de Jin Jiyan Azadî veng da’

 

Ruken Zeryam Işik dewam de wina vat: “25ê Teşrîna Peyêne bi hawayêkê xurt tesîr meydanan ser o kerd. Eşkerayîyan ra bigîrê, heta rayîrşîyayîşê girseyî tesîr meydanan ser o kerd. Pêro hedefî meydanan de ameyî ziwan. Goreyê serrê vîyarte de hîn tewr zêde  xurt bî. Bi qedexekerdişê ‘Jin Jiyan Azadî’ cinîyan hîn zêde meydanan pirr kerd. Her cayî de ‘Jin Jiyan Azadî’ veng da."

 

‘Ma do xebatanê xo dewam bikerê’

 

Ruken Zeryam Işik tewr peyîn wina vat: “Ma do bi nê sazbîyayîşê rêxistinkerde tîya ra tepîya pêro wareyan de xebatê xo bêmabên bikerê. Ma do bi kampanyaya, atolye û xebatanê xo wareyan de bê. Rêxistinbîyayîş vengî efû nêkeno. Demê peyîn de qetilkerdişê cinîyan vejîyayê sewîyeya tewr cor. Ganî ma na babete ser o vinderî. Ma do xebatanê xo, têkoşînê xo bêmabên dewam bikerê.”