AMED- Kesê ke netîceya erdlerzê 6ê sibata 2023ine de dinyaya xo bedelnayî, goristanê Yenîkoyî de ameyî yadkerdiş.

 

Kesê ke erdlerzê 6ê sibata 2023ine yê merkezê ci Mereş bî, dinyaya xo bedelnayî, bi serkêşîya Platformê Pawitişê Bajarî û Paştdayîşî yê Amedî, Platformê Îdareyê Felajetî û Paştdayîşî (DMS) û Platformê Kede û Demokrasî yê Amedî, Goristanê Yenîkoyî yê Rezanê Amedî de gorê xo ser ameyî yadkerdiş.  

 

 

Hemserekê DMS’î Şerefxan Aydin, kesê ke erdlerz de dinyaya xo bedelnayî yad kerd. Parlamentera DEM Partîye ya Amedî Adalet Kaya zî çîyê ke wextê erdlerzî de qewîmyayî ard vîr û da zanayîş ke xeylêk kesan semedê serdî, vêşanî û têşanî dinyaya xo bedelnayî. Adalet Kaya, dîyar kerd ke badê erdlerzî tu gamî nêameyê eştiş û vat: “Ma do heqê mexdûrê erdlerzî her cayî de bipawê.” 

 

Parlamenterê CHP’yî Sezgîn Tanrikulu zî vat ke tena yew wezîfedarê îstîmlakî semedê erdlerzî nêameyo muhakemekerdiş û venga paştdayîşî kerd. 

 

Badê qiseykerdişî, beşdaran qerenfîlî dayî serê gorê kesê ke dinyaya xo bedelnayî.