Elfazî Toral

 

STENBOL - Dayîka Aştîye Sabîha Bozan da zanayîş ke aştîya komelî bi yew hetî mumkin nîya û ganî  îqtîdar gamanê somutî bierzo û vat: “Aştîyêke bê kay, bê hîle û serê raştîyan de ameya awankerdiş lazim a. Bi xapênayîş, hêriş, qetilkerdişî, aştî mumkin nîya.”

 

Heyetê Îmraliyî yê Partîya Têduştî û Demokrasî (DEM Partî) 28ê kanûne de Rayberê PKK’yî Abdullah Ocalanî dir pêvînayîş kerd û mesajêk Abdullah Ocalanî ke 7 madeyî pê ameyîne, ame parekerdiş. Hetê pêro hetan ra pozîtîf ame vînayîş. 22ê çeleyî de zî pêvînayîşê diyîn ame kerdiş. Dayîka Aştîye Sabîha Bozan derheqê pêameyîşî aştîya komelî, waştiş û pêşnîyazîyan de qisey kerd. 

 

Dayîka Aştîye Sabîha Bozan ke bi serran o waştişê aştîye de israr kena û têkoşîn dewam kena, dîyar kena ke cewabê semedê aştîye nêgînê û wina vat: “Aseno ke na dewlete aştîye baş fêm nêkerda yan zî goreyê hesabê înan o. Ma zî sozê aştîye da. Ma do heta peynîya emrê xo têkoşînê aştîye dewam bikerê. Aştî waştişêk zaf pîroz a. Aştî cuya merdiman a, aştî semedê xoza, semedê merdimayî û semedê her tiştî zaf muhîm a. Bi aşman o ma taqîb kenê, vatişê aştî est ê. Ganî rayîrê aştîye bi nê rengî nêbo. Devlet Bahçelî hetêk ra vano wa Raybertî bêro meclîs de qisey bikero, ma do  zemînê aştîye awan bikerê ke êdî şer nêqewîmyo, la heto bîn ra ma vînenê ke hema zî tecrîdê serê Raybertî dewam bikero, serê tepişteyan de zî tecrîd est o. Aştî bi no hawayî pê nîna. Bê wedaritişê tecrîdî û vejîyayîşê zîndanî do azadî û aştî senîn bo? Şert û mercê aştîye est o. Ganî şert û mercê Birêz Abdullah Ocalanî bi ca bîyarê û rayîr abikerê. Ganî keye, avûkat, partîyê sîyasî şêrê ey bivînê.”

 

‘Ganî her kes wezîfeyê xo ca bîyarê’

 

Sabîha Bozan dewam de wina vat: “Tirkîya bi SÎHA’yan hêrişê Rojawanî kena. Her roje sivîlan qetil kena. Problemê şarê Sûrîye her ke şino tewr giran beno. Ganî pêro şar uca de meclîsê xo awan bikerê û problemanê xo rê çareserîyan bivînê. Hetêk ra Tirkîya çeteyan şirawena Sûrîye û heto bîn ra zî bomba varnena. Prosesêk wina de, binê nê şert û mercan de hîmê aştîye bi nê metodî nîno dayîş. Ma Dayîkê Aştîye zî venga dewlete danê; ma aştîye bingehêk rastî ser wazenê. Aştî bi xapênayîş, hêriş û kiştişî pê nîno. Aştîyêke mende, bêkêmasî yê serê bingehê rastî hewce yo. Waştişê ma o yo ke tecrîd peynî bibo û tepişteyê sîyasî bêrê veradayîş. Hema zî tu mesaj û bangewazîyê Serekî çin ê. Semedê aştîye ganî cidiyet bibo. Veng CHP'yî ra nîno. Her kesê ke hemverê nê qirkerdişan de bêveng manenê sûcdar ê. Semedê nê ganî her kes bi berpirsyarî wurzo.”

 

‘Yew het aştî mumkin nîya’

 

Sabîha Bozan tewr peyîn wina qedêna: “Bi serran o ma dayîkî semedê aştîye qîrenê. Kesî goş nêda ma. Wa reyke ma goşdarî bikerê û wa bipersê ka ma çi wazenê. Dayîkî problemê dayîkan fam kenê. Nê serran de ma xeylêk rey ameyî xapênayîş. Bi fermanêk serê zêrî û xapênayîşî vejîyayî vernîya ma.  Ma nika nê vanê, êdî çîyê winasî qebûl mekerê. Aştîyêke azad û têduştî tena semedê şarê kurdî nê, semedê her kesî esas a. Ma aştîyêke serê esasê heq, huqûq û edaletî wazenê.”