STENBOL - Rojnamegere Îzel Sezer derheqê zext û hêrişê demê peyîn de serê kedkarê çapemenîye zêde bîyî ercna û da zanayîş ke bi taybetî çapemenîya kurde hedef de ya û wina vat: “Ganî ma meslegdaranê xo dir bêrê têhet û wayîrê yewbînan vejîyê.”

 

Zextê îqtîdarî yê çapemenîya azade ser o dewam kenê. Endama Heyetê Îdarekarîya Karî ya Çapemenîye ya DÎSK’î rojnamegere Îzel Sezer derheqê babete de ercnayîş kerd.

 

Îzel Sezer da zanayîş ke operasyonê destbendkerdişî û tepiştişî yê hemverê rojnamegeran darbeyêk çapemenîye yo û wina vat: “Nê tedayî, polîtîkaya vînîkerdişî îqtîdarî yê. Netîceya zext û şîdetî de gelek rojnamegerî ameyî destbendkerdiş û tepiştişî. Çend roje verî 7 hevalê ma yê rojnamegerî ameyî tahlîyekerdiş. Badê prosesê bêhuqûqî yê 40 rojan dima ameyî veradayîş. Hevalê ma yê Şîşhaneyî waştî di hevalê xo yê ke ameyî qetilkerdiş yad bikerê, ameyî tepiştiş. Îqtîdar wazeno çapemenîya ke raştîyan dana eşnawitiş, bêveng bikero.”

 

‘Çapemenîya Kurde hedef de ya’

 

Îzel Sezer dewam de wina vat: “Rojnamegerî semedê heqê girewtişê xeberan semedo ke heqê girewtişê xeberan pawenê yenê tepiştiş. Dinya de pêro îqtîdarî biwazê çîyêk biniminê, o wext zextê çapemenîye kenê. Ma tîya zî eynî nimûneyan vînenê. Tena çapemenîya kurde ser o nê, şarê kurdî zextî est ê. Bêguman zî bi taybetî çapemenîya kurdan de zext est ê û hedefî de yê.”

 

‘Ma henverê tedayan têkoşîn bikerê’

 

Îzel Sezer dîyar kerd ke rojnamegerî zext, şîdet û sansurî dir yenê têhet û wina dewam kerd: “Ma xeylêk çîyan dir yenê rî bi rî. Asayîş, saetê dergî yê xebate, heqdestê kêmî nê pêro meseleyê ke rojnamegerî ciwîyenê. Ma hemverê zextan venga pêro meslegdaranê xo kenê. Ganî ma hemverê nê hewldayîşan bîyarê têhet û pîya têkoşîn bikerê.”

 

‘Tîya ra tepîya ganî ma têhet bê’

 

Îzel Sezer tewr peyîn wina vat: “Ganî ma pêro meslegdarê yewbînan wayîrê yewbînan vejîyê. Ganî ma bêrê têhet. Kurdî, tirkî, sunnî, elewî ferq nêkeno. Ganî ma wayîrê yewbînan vejîyê. Ma hemverê bêhuqûqîyan têkoşîn bikerê. Nê semedî ra xebatê ma yê cîya est ê. Ma do xebatanê xo dewam bikerê.”