STENBOL - Roniştişê dewaya rojnamegere Esra Solîn Dal, Mehmet Aslan û Erdogan Alayumat de qerar ame dayîş ke aqûbetê dosyayê cîyayê derheqê rojnamegeran de ameyê akerdiş, bêrê perskerdiş. 

 

Roniştişê 2yîn ê dewaya mûxabîra Ajansê Mezopotamyaye (MA) Esra Solîn Dal, Mehmet Aslan û rojnameger Erdogan Alayumat ke bi îdiayê “endamîya rêxistine” yenê muhakemekerdiş, 25ine Dadgeha Cezaya Giran ya Edlîyeyê Stenbolî yê Çaglayanî de ame kerdiş. Avûkat û rojnameger Alayumat roniştişî de amade bîyî û rojnameger Mehmet Aslan zî Edlîyeyê Anqarayî de bi rayîrê SEGBÎS’î tewrê roniştişî bîyî. 

 

Mehmet Aslan eynî wextî de çarçewaya cipersayîşê “propagandaya rêxistine” de zî îfade da û vat: “Viraştişê xeberan ê babetêk de çira do bibo propaganda? Nêbeno ke xebatê rojnamegerîye sey sûcî bêrê mojnayîş.” 

 

Avûkatê Mehmet Aslanî, Habat Demîrcan ard vîr ke fikrê pispora hetê P24î ra bi avûkat Benan Moluye ameyê amadekerdiş pêşkeşê dosyaye kerd û vat: “Fikrê kesî/a pispor hetê miwekîlê mi ra ameyo amadekerdiş. Çarçewaya qerarê dadgehê mîyanneteweyî ra ame amadekerdiş û ma wazenê qonaxê muhakemekerdişî de nê nêrînî esas bêrê girewtiş.” Habat Demîrcan, waştişê beraetî yê miwekîlê xo kerd. 

 

Erdogan Alayumat û avûkatê ey zî vat ke rewşa bîyaye de çîyêk vajê çin o. 

 

Dadgehe, semedê aqûbetê dosyayê cipersayîşî yê cîya yê derheqê Erdogan Alayumat û Mehmet Aslan de bêro persayîş, qerar da ke Serdozgerîya Komare ya Stenbolî dir muzekkere bêro nuştiş. Roniştişê dewa taloqê 6ê gulane ame kerdiş.