Mîdye Miqted

 

HELEB - Endamê PYD'yî yê Helebî dayî zanayîş ke ê semedê azadîya Rayberê PKK'yî Abdullah Ocalanî lingan ser o yê û wina vatî: “Ganî ma wayîrê Rayberê xo vejîyê.”

 

Rayberê PKK’yî Abdullah Ocalan bi komployê mîyanneteweyî ke 9ê Teşrîna Verêne 1998ine dest pêkerd û 15ê Sibata 1999ine de Kenya ra ame remnayîş, teslîmê Tirkîya ame kerdiş. Nêrazîbîyayîş hemverê komployî sey her cayê Helebê zî dewam keno. Cinîyê Helebî çalakîyab de hemverê komployî vejîyenê, qisey kerdî.

 

'Waştişê komplogeran pê nêame'

 

Endama Partîya Yewîya Demokratîke (PYD) Meyede Erebo da zanayîş ke têkoşînê înan ê hemverê komployê mîyanneteweyî dewam keno û wina vat: "Ma hemverê komployî çalakîyê protestoyî organîze kenê. Bi komployêk mîyanneteweyî Rayber ame tepiştiş. Ma ewro nê komployî şermezar kenê. Hêzê mîyannetewî waştî ke Rayber sey sorişêk ke serkewte nêbo bimojnê. Labelê waştişê komplogeran pê nêame."

 

'Îmrali bî merkezê îradeyî'

 

Meyede Erebo dîyar kerd ke Abdullah Ocalan Îmraliyî kerdo cayê zanistî û wina vat: "Rayber Abdullah Ocalan bi xoverdayîşê xo ke bî 26 serrî yo dewam keno, Îmralî kerd merkezê xoverdayîş, îrade û zanistî. Bi têkoşînê xo Rayber bî rayberêk mîyanneteweyî. Semedê pêro dinya bî remza azadî û aştî. Bi têkoşînê şarê kurdî her çar hetê pêvînayîşê Rayberî dir pê ame."

 

'Ganî ma wayîrê Rayberê xo vejîyê'

 

Endama Partîya Yewîya Demokratîke (PYD) Elîf Reşîd zî dîyar kerd ke ganî kurdî Abdullah Ocalan û têkoşînê ey rê wayîr vejîyê û wina vat: “Ma komployo ke bî 26 serrî yo Rayberî ser o ameyo kerdiş, vanê êdî bes o. Bî çend reyo ke pêvînayîş Rayberî dir yeno kerdiş la ma Rayberê xo nêvînenê. Ma paweyê a roje yê ke ma Rayberê xo hem ekranan ser o, hem zî gane mîyanê xo de bivînê. Waştişê ma yê yewin û yê peyîn o yo ke ma Rayberê xo azad bivînê. Ganî rêxistinê heqê merdiman wayîrê Rayberî vejîyê û bi wezîfeyê xo wurzê. Ganî ma pêro wayîrê Rayberê xo vejîyê. Ma azadîya Rayberê xo wazenê. "

 

'Hêzê ma xoverdayîşê Rayberî yo'

 

Tewr peyîn Elîf Reşîd wina vat: "Ewro têkoşînê ma verda ke pêvînayîş Rayberî dir bêro viraştiş. Ma do  têkoşîn û xoverdayîşê xo yê semedê Rayberî dewam bikerê. Heta ma Serekê xo mîyanê xo de nêvînê, ma do fek têkoşînê xo ra vera nêdê. Ma ewro hêz û moralê xo Rayberê xo ra gênê."