STENBOL- Cinî derheqê pêvînayîşê bi Rayberê PKK’yî Abdullah Ocalanî dir ameyo kerdiş û rolê meclîsî yê çareserîya meseleya kurdî de qisey kerdî û vatî: “Ma proses ra bi hêvî yê. Ma bi qerar ê ke semedê aştîye têkoşînê xo berz bikerê. Ganî pêro hetî paştdayîş bidê nê îmkanê tarîxî.”

 

Badê pêvînayîşê ke heyetê Partîya Têduştî û Demokrasî (DEM Partî) Rayberê PKK’yî Abdullah Ocalanî dir kerdî, munaqeşeyê derheqê çareserîya demokratîke ya meseleya kurdî dewam kenê. Mesajê Abdullah Ocalan hetê heme hetan ra pozîtîf ame vînayîş û sewbîna semedê çareserî zî yew zemînê muhîm yê TBMM’yî amebî mojnayîş. Cinîyan derheqê babete de û rolê meclîsî de ercnayîş kerd.

 

Sîyasetmedare Arzu Firat bale ant serê vatişê Devlet Bahçelî yê seke ‘wa Abdullah Ocalan bêro meclîsî de qisey bikero’ û vat: “Vengdayîşêk wina semedê çareserîya meseleya kurdî muhîm a. Badê nê pêvînayîşê ke Birêz Ocalanî dir ameyî kerdiş û deklerasyonê 7 madeyî pê ameyîne, semedê dîyalog û muzakereyî mihîm bî. Bêşik eynî wextî de meclîs zî zemînêk muhîm semedê çareserî yo. Semedê çareserî dîyalog muhîm o. Ganî hetê komelê zî tewrê prosesî bibê. No semedê ma muhîm o.”

 

‘Şer û cinî’

 

Arzu Firat bale ant serê şer û pêrodayîşan û dîyar kerd ke yê tewr mexdûr benê cinî yê û wina vat: “Şer netîceya zîhnîyetê serdestî yê camêrdî de vejîyeno werte. Yê ke tewr zirar şer ra vînenê cinî yê. Nê semedî ra cinî benê kerdoxê nê aştî. Eke aştîyêke awan bibo ganî bi têkoşînê ke cinî kenê awan bibo.”

 

Îmkanê tarîxî

 

Arzu Firat tewr peyîn wina vat: “Lazim o no îmkano tarîxî baş bêro ercnayîş. Cinî nîmeyê komelî awan kenê. Cinîyê kurdî û cinîyê tirkî wayîrê têkoşînêk hempar ê. Lazim o no prosesê aştî bêro komelîkerdiş û pêro beşê komelî tewrê nê prosesî bibê. Semedo ke na babete pêro komelî eleqedar kena. Lazim o pêro beşê komelî na babete de wayîrê helwestî bê. Lazim o her kes bi vatişê xo tîya de bo û bi waştişê xo beşdarê nê prosesî bibo. Tena eke wina bo, ma eşkenê aştîya komelî awan bikerê. Ma nê çî ra hêvîdar ê û ma qerardar ê ke têkoşînê xo yê aştî dewam bikerê.”

 

‘Barê ma giran o rayîrê ma derg o la ma bi hêvî yê’

 

Endama Meclîsê Cinîyan ê HDK’yî Gulşen Daşdogan zî wina vat: “Pêameyê aştîye û hetê komelî qebûl kerdê, tewr zêde semedê cinîyan muhîm o. Şer de vernê de cinî û tutî tesîr benê. Coka aştî waştişê ma pêro cinîyan a. Ma venga Baxçelî yê 7ê teşrîna verêne de kerd, muhîm vînenê. La qîm nêkeno. Semedo ke no proses zemînê destûrê bingehîn nişt ro. Semedo ke ma prosesê aştîye komelî vînenê û bikerê waştişê şarî, ganî ma kuçe bi kuçe, tax bi taxe bigêrê. Ma cinî asayîş de nîyê. Her roje cinî yenê qetilkerdiş. Cinî tewr zêde mîyanê keyeyî de şîdet vînenê. Barê ma giran o, rayîrê ma derg o la ma bi hêvî yê. Ganî pêro kes zerrî ra bo û gamê bi zerrî bierzo. Ganî her kes paştdayîş bido prosesê aştîye.”