Melek Avci

 

HEWLÊR - Parlamentere Gulcan Kaçmaz Sayîgît, derheqê pêvînayîşê Heyetê Îmraliyî yê Serekê Pêroyî yê PDK'yî Mesûd Barzanî dir ame kerdiş de wina vat: "Fotografo samîmî û pozîtîf yê pêvînayîşê ma yê birêz Mesûd Barzanî dir vejîya werte, hêvî da ma. Hemkarîyê birêz Barzanî yê semedê prosesî do bibo sebebê ruhê yewîya netewî zî."

 

Heyetê Îmraliyî yê Partîya Têduştî û Demokrasî (DEM Partî) çarçewaya serdayîşê xo yê badê pêvînayîşê Rayberê PKK'yî Abdullah Ocalan dir kerd, Hewlêr de pêvînayîşanê xo dewam keno.

 

Mîyanê heyetî de Heyetê Îmraliyî yê DEM Partî de Pervîn Bûldan û Sirri Sureyya, Hemserekê Pêroyî yê Partîya Herêman ê Demokratîke (DBP) Keskîn Bayindir, Buroyê Huqûqî yê Asrine ra Ozgur Erol û Îbrahîm Bîlmez, Hemverfekê Komîsyonê Têkilîyê Teberî yê DEM Partî Berdan Ozturk, parlamentere Gulcan Kaçmaz Sayyîgît û Mehmet Kamaç estbî.

 

Parlamenter Gulcan Kaçmaz Sayyîgît derheqê pêvînayîşan de ajansê ma rê qisey kerd. 

 

Gulcan Kaçmaz Sayyîgît bale ant pêvînayîşê ke Başûr de ameyî kerdiş ser o û vat: "Dewamê proseso ke ameyo destpêkerdiş de heyetê ma badê demêk derg birêz Ocalanî dir di serdayîşê muhîmî kerd û goreyê pêşnîyaz û ewnîyayîşê înan partîyê sîyasî yê Tirkîya dir pêvînayîş kerd. Ma nika çarçewaya nê pêvînayîşan de yê. Ma Hewler de yê, vernê de ma birêz Mesûd Barzanî dir pêvînayîş kerd. Birêz Mesûd Barzanî bi pozîtîf pêşwazîyê heyetê ma kerd. Ma derheqê prosesî de fikrê xo vat. Ma bi wezîfeyê xo fikrê birêz Ocalanî yê derheqê xo û nê prosesî de qalî kerd."

 

'Ma do têkilîyê xo dewam bikerê'

 

Gulcan Kaçmaz Sayyîgît, wina vat: "Birêz Mesûd Barzanî xeylêk rey neql kerdo ke o bi raştî semedê çareserkerdişê nê problemî bi rayîrê aştiyane û demokratîke amade yo û nê demî de zî çi destê ci ra bêro do bikero. No semedê ma zaf bierj o. Ma do têkilîyê xo dewam bikerê. Ma a bawerî de yê, hêvî kenê û wazenê no problem demêk tewr kilm de bi rayîrê aştiyane û demokratîke çareser bibo û semedê nê zî têkoşîn kenê. Na noqta ser o ke rol û wezîfeyê birêz Barzanî berz o, ma sohbetê xo dewam kerd. Dîyar o ke ê do çarçewaya nê erj û wezîfeyî de wezîfeyê xo ca bîyarê."

 

'Bingehêk aştî bêro awankerdiş'

 

Gulcan Kaçmaz Sayyîgît, dîyar kerd badê Hewlêrî do verê xo bidê Silêmanîye û vat: "Badê ke pêvînayîşê ma yê Hewlêrî peynî bî, ma do şêrê Silêmanîye û pêvînayîşan bikerê. Ma hêvîdar ê ke pêvînayîşê pozîtîfî bê, semedo ke her qiseykerdoxêk pozîtîfî do bibo esasêk semedê awankerdişê na aştîye. Ma nê sey sîyêke tarîxî erjnenê. Wezîfeyê nê heyetî tarîxî yo. Semedo ke çareserîya meseleya kurdî bi metodê demokratîke û aştîye tena semedê Tirkîya nê semedê çar parçeyê Kurdistanî û Rojhelatê Mîyanên zî do feyde bigîrê. Êdî wext ameyo ke her kes bêro û bi wezîfeyê xo wurzo.”

 

'Bibo sebebê ruhê yewîya neteweyî'

 

Gulcan Kaçmaz Sayyîgît, tewr peyîn wina vat: "Hem pêşwazîkerdişî de û hem zî pêvînayîş de ame vatiş ke ganî no problem bi temamî bi rayîrê aştîyane bêro çareserkerdiş û her kes na noqta de berpirsyarîyê xo bi ca bîyaro. Birêz Mesûd Barzanî zî dîyar kerd ke destê înan ra çi bêro do bikerê. Fotografê samîmî û pozîtîf ke pêvînayîşê ma yê birêz Mesûd Barzanî dir vejîya werte, hêvîyêke da ma. Hemkarîyê birêz Barzanî yê semedê prosesî do bibo sebebê ruhê yewîya neteweyî zî. Badê pêvînayîşan do heyetê ma eşkerayîyêke bido. Wexto ke ma agêrê Tirkîya ma do eşkerayîya çapemenîye bidê.”