ÎZMÎR - Cinîyan reaksîyon vera tayînkerdişê qeyûman ê Şaredarîya Bajarê Pîlî ya Wanî mojna û dîyar kerdî ke tayînkerdişê qeyûmî 15ê Sibate de zî manayêk ci yê cîya est o û vatî ke ê do hemverê tedayan bêveng nêmanê. Cinîyan dîyar kerdî ke eke proses goreyê hukmatî bêro kerdiş, do qeyûm û desteserkerdişê heqan dewam bikero.

 

Bafê ke 3 serrî û 9 aşmî cezaya zîndanî Hemşaredarê Bajarê Pîlî yê Wanî Abdullah Zeydan ame birnayîş, 15ê Sibate de qeyûm tayînê şaredarî ame kerdiş. Welatijê ke awanîya şaredarî de nobete girewtêne, saetê serê sibayî de hetê polîsan ra ameyî astengkerdiş, bi gazê îsotî hêrişê înan ame kerdiş, xeylêk kesî bi kuyayîş ameyî destbendkerdiş. Badê qeyûm ame tayînkerdiş kesê ke kuçeyan de qeyûm şermezar kerdî, binê îşkenceyî de ameyî destbendkerdiş. Xoverdayîşê kuçeyanê Wanî dewam keno, reaksîyonê hemverê qeyûman zî zêde benê. Cinîyê Îzmîrî reaksîyon vera tayînkerdişê qeyûmî yê Şaredarîya Bajarê Pîlî ya Wanî mojnayî û dîyar kerdî ke tayînkerdişê qeyûmî serrgêra komployê mîyanneteweyî yê hemverê Rayberê PKKyî Abdullah Ocalanî de manayêk ci est o û ê sey cinî hemverê qeyûmî bêveng nêmanenê û do xo ver bidê. 

 

'Ma qebûl nêkenê'

 

Aktîvîsta Têgêrayîşê Cinîyanê Azadan (TJA) Ayşenûr Eker ke dest bi qiseykerdişê xo kerd wina vat: “No demêk derg o Wan de xoverdayîş yeno kerdiş. Qeyûm ame û bi hawayêk bêqanûnî nişt ro. Ma ra yeno waştiş ke ma nê qebûl bikerê. Ma wazenê dîyar bikerê ke ma tena nê qebûl nêkenê, ma do hemverê nê de vinderê û têkoşînê xo na mana de hîra bikerê. Paştdayîşê şarî bi coşêk pîlî yê demêk derg o semedê şaredarîya xo, îradeyê xo, helwest û xoverdayîşo ke hemverê ci aver berdî, bi rastî zî cayê keyfweşî yo. Bi na wesîla ma Îzmîr û Ege de semedê hevalanê xo yê Wanî silam û rêzêdarîyê xo mojnenê."

 

'Hukmat kurdan ra vano heqê şima yê vengdayîşî û weçînayîşî çin o'

 

Endama Heyetê Îdareyî ya Kongreya Demokratîke ya Şaran (HDK) Ayşe Ozdamar zî wina qalî kerd: “Abdullah Zeydan nêame cezakerdiş, ceza kerdî. Meseleya cezakerdişî est a. Her çî hende eşkere yo ke vatişî bêmana manenê. Wan de her kesî raya xo da namzedanê hemşaredaran ê DEM Partî zî teda bî la ancî şarî baş xo ver da û heta nika zî xo ver dano. Ez vajî no bêhurmetîyê îradeyê şarî yo. No îxrackerdiş o, ez vana no metodêk dizdî yo. Hukmat wazeno vajo ke heqê kurdan ê raydayîşî û weçînayîşî çin o. Seserra 21ine de no çîyêk zaf tehluke yo."

 

'Şar aştîye wazeno, qeyûm tayîn keno'

 

Înîsiyatîfê Dayîkê Aştîye Fahriye Aydin zî reaksîyon mojna û vat: “Ma nê çî nêwazenê, şermezar kenê. Şar aştîye wazeno, la ê qeyûm tayîn kenê. Eke aştî wazenê çira qeyûm tayîn kenê? Ma nê nûwazenê, ma aştîye wazenê. Şarê ma bi îradeyê xo ser keweno, la qeyûm tayîn keno. Ma bi nê çî razî nîyê, heqê înan çin o ke nê çî şarê kurdî rê bikerê. Şarê kurdî çîyêk xirab nêwazeno, aştî wazeno. Şarê kurdî xêrcê aştîye çîyêk bîn nêvano."

 

'Nêwazenê xizmetê şarî bikerê, wazenê talan dewam bikerê'

 

Yew endama Komeleya Heqê Merdiman (ÎHD) ê Şubeyê ÎzmîrînTûgçe Ceylan zî wina vat: "Eke şima qeyûm tayîn bikerê, şima çira rayan danê. Çira ma şî weçînayîş? Sebebê yewin yê qeyûmî o yo ke nê ji bajarî herêmê sînorî ser de yê û diyîn zî îqtîdar hemverê sîstemê hemserekî yo. No zî yeno manaya goşnêdayîşê temsîliyetê têduştî, semedo ke qeyûm  wayîrê zîhniyetê yewperestî yo. Bi taybetî zî hukmat wazeno têkilîyê şaredariyan şarî dir bivisno. Ê nêwazenê xizmetê şarî bikerê, la semedê dewamkerdişê qezenc û talanî kenê. Qeyûm heqê ziwanê dayîke ya şarî zî keno hedef û qeyûm zî do hewl bido ke vernîya xebatanê ziwanê dayîke yê şaredarî pado.”