STENBOL - Çarçewaya cipersayîşê merkezî yê Stenbolî de 3 rojnamegerî amebî destbendkerdiş. DFG û DÎSK Basin-Îş’î reaksîyon vera destbendkerdişê rojnamegeran mojnayî û waştî bêrê veradayîş. 

 

Ewro serê sibayî çarçewaya cipersayîşê merkezî yê Stenbolî de erzîya xeylêk adresan ser. Badê cigêrayîşê keyeyan, rojnamegere Elîf Akgul, Yildiz Tar û Ercument Akdenîz zî mîyan de 52 kesî ameyî destbendkerdiş. 

 

Komeleya Rojnamegeran ê Dîcle Firatî (DFG) û DÎSK Basin Îş’î hesabê xo yê medyaya dijîtale ser o eşkerayîye da û reaksîyon vera destbendkerdişê rojnamegeran mojna. 

 

DFG’yî eşkerayîye de vat: “Çarçewaya cipersayîşê merkezî yê Stenbolî de sîyasetmedarî, hunermendî û 3 rojnamegerî zî mîyan de xeylêk kesî ameyî destbendkerdiş. Mîyanê destbendkerdişan de rojnamegere Elîf Akgul, Yildiz Tar û Ercument Akdenîz zî est ê. Ma, destbendkerdişê meslegdaranê xo qebûl nêkenê. Ma do hemverê operasyonê destbendkerdişî yê hemverê rojnamegeran ke êdî rêze bîyê, qebûl nêkenê. Ma venga pêro rêxistinê meslegî kenê ke hemverê nê operasyonan bi ruhê paştdayîşê têkoşîn bikerê.” 

 

DÎSK Basin-Îş’î zî dîyar kerd ke endama înan ê heyetê îdareyê verî Elîf Akgul û endamê înan Ercument Akdenîz û Yildiz Tar ameyî destbendkerdiş û vat: “Ma nê operasyonê hemverê rojnamegeran qebûl nêkenê. Ganî hevalê ma lezkî bêrê veradayîş.”