Rozerîn Gultekîn

 

STENBOL - Rêxistina DEM Partîye ya Stenbolî bi sloganê "Ma xo rêxistin bikerê azad bibê" şina 3ine Kongreya Asayî. Endama Komîsyonê kongreye Satiye Ok derheqê kongre de qisey kerd û vat: “Nê demî de rêxistinbîyayîş û xelasî muhîm a. Ma venga şarê xo kenê ke semedê azadîya xo bi rêxistin bibê û têkoşîn bikerê. Rêxistina DEM Partîya Stenbolî sey demê 3ine yena birêxistinkerdiş û pîlbîyayîş hedef kena.”

 

Rêxistina Partîya Têduştî û Demokrasî (DEM Partî) ya Stenbolî roja yewşeme 23yê sibate 3ine Kongreya xo ya Asayî organîze kena. Endama Komîsyonê Kongreya Asayî ya DEM Partî ya Stenbolî Satiye Ok derheqê kongreya ke bi şîarê "Ma xo bi rêxistin bikerê, azad bibê" de ercnayîş kerd.

 

Hemverê faşîzm de têkoşîn

 

Satîye Ok derheqê xebata DEM Partîye ya Stenbolî ya demê vîyarte de qisey kerd û wina vat: “Stenbol bajarêk ke sinifa karkerî, cinî, têgêrayîşê ekolojîst û şarê kurdî ci de ciwîyenê. Mîyanê DEM Partîye de pêwa têgêrayîşê ekolojî, têkoşînê azadîya cinî yê bi serran hemverê sîyasetê qeyûm têkoşîn keno, têkoşînê kede, waştişê cuye, hemverê hêrişê şarê kurdî ser o vindert. Nê serdemî ke kiştişê cinîyan resa sewîyeya tewr cor, rêxisitna cinîyan a DEM Partîye ya Stenbolî hewl da ke hemverê kiştişê cinîyan mil bi mil xo ver bidê û kiştişê cinîyan ra vajê bes o.”

 

Hewcedarîyê têkoşînê pîya

 

Satiye Ok derheqê hîrêne kongreya DEM Partîye ya asayî ke do bikerê ser o vat: “Nê prosesî de îqtîdar hewl da ters û bêhêvîtî awan bikero. Ma prosesêk cinî, karker û kedkarî bêameyox yenê verdayîş, xoza yena talankerdiş ra derbaz benê. Nê hawirî de DEM Partî û pêameyê xo hewl dayî rayîrê hîrêne bikerê rojeve. Hewl dayî hêvîye zergûn bikerê û bibê vengê pêro şaran. Ma eşkenê qalê ke DEM Partî hewl dayo metodê hîrêne xurt bikero, kerdo. DEM Partî do hemverê faşîzmî têkoşînê yewbîyaye esas bigîro. Ma venga pêro kesan kenê ke têkoşîn bikerê.”

 

Bi sloganê ‘Ma xo rêxistin bikerê azad bibê’ şinê kongre

 

Satiye Ok tewr peyîn wina vat: "Ma xo rêxistin bikerê, azad bibê" şinê hîrêne kongreya asayî. Xêrcê têkoşînî metodêk ma yê bîn çin o. Coka ma vanê; ‘ma xo rêxistin bikerê azad bibê’. Nê prosesî de rêxistinbîyayîş û azadî ferz a. Ma venga pêro şarê xo kenê ke semedê azadî têkoşîn bikerê. Ma venga pêro şarê xo, cinîyan, karker, kedkaran kenê ke tewrê kongreye bibê.”