MERKEZÊ XEBERAN - Newroza Serhedî ke bi hezaran kesî tewr bî û adir, bi sloganê “Bijî Serok Apo” tavistî, şarî paştdatîş da vengdayîşê Rayberê Şarê Kurdî Abdullah Ocalanî û azadîya fîzîkî waşt.

 

Bi sloganê, "Raybero Azad Komelê Demokratîkî/Semedê Azadîya Newroze Komelê Demokratîkî" bajarê Serhedî de adirê Newroze ame tavistiş û bi coşêk pîl Newroza 2025ine ame pîrozkerdiş. 

 

 

Agirî

 

Bazarê Samanî yê Agirî de pîrozbayîyê Newroze pê ame. Serê sibayî ra welatijan verê xo da meydan. Meydan de sloganê, “Bijî Serok Apo” û “Bê Serok jiyan nabe” ameyî berzkerdiş. Badê rezgirewtişî pîrozbayî dest pêkerd. 

 

Endama MYKyî ya Partîya Herêmanê Demokratîke (DBP) Muazzez Orhan qisey kerd û bale ant muhîmîya Newroze ser û vengdayîşê wayîrvejîyayîşê  Rayberê Şarê Kurdî Abdullah Ocalanî kerd. 

 

Badê cû parlamenter Sirri Sakik qisey kerd û dîyar kerd ke ganî her kes paştdayîşê prosesî muzakere bikero. 

 

Badê qiseykerdişan adirê Newroze ame tavistiş, sloganê, “Bijî Serok Apo’ ameyî berzkerdiş. Jehrmar vejîya sehne ser û pîrozbayî bi kaykerdişê govende peynî bî.

 

Qers- Dîgor

 

Qezaya Dîgorî ya Qersî de zî pîrozbayîyê Newroze ame kerdiş. Pîrozbayî meydanê qeza de pê ame. Parlamenter û sîyasetmedarî tewrê pîrozbayî bîyî. 

 

Parlamenter Yilmaz Hun, qisey kerd û bale ant serê bedelê ke heta nika ameyê dayîş û vengdayîşê wayîrvejîyayîşê mesajê Rayberê Şarê Kurdî Abdullah Ocalanî kerd.

 

Parlamentere Sabahat Erdogan Saritaş zî wina vat: “No vengdayîşê birêz Abdullah Ocalanî, tarîxî yo. Semedê pêro şaran vengdayîşêk bi rûmet o. Bingeyê pêro problemê ke Tirkîya de yenê ciwîyayîş, problemê kurdî est o. Eke problemê kurdî çareser bibo do pêro problemê ekonomî û sîyasî çareser bibê.

 

Badê qiseykerdişan adirê Newroze hetê Dayîkê Aştîye ra ame tavistiş. Komê herêmî vejîyayî sehne ser û deyîranê xo vatî. Welatijan zî bi kaykerdişê govende û berzkerdişê sloganê “Jin jiyan azadî” Newroze pîroz kerdî.