AMED - Nuştoxa Tunusî Zouhaour Mecherguî ke Newroza Amedî ya tarîxî taqîb kerd, da zanayîş ke ganî lezkî cewabê vengdaşê aştîye yê Abdullah Ocalanî bêro dayîş û vat, şer nê do muzakere aştî bîyaro.

 

Newroza tarîxî ya Amedî bi tewrbîyayîşê mîlyonan kesî pê ame û yewin waştişo ke ame kerdiş zî o zî azadîya Rayberê Şarê Kurdî Abdullah Ocalanî bî. Fransa, Katalonya, Ispanya, Îrlanda, Belçîka, Almanya, Îtalya, Kenya, Çekya, Hîndîstan, Misir, Îran, Lubnan, Lîbya, Iraq, Tunus û Başurê Kurdistanî de xeylêk sendîkawanî, temsîlkarê sazgehê komelê sivîlî tewr bî.

 

Nînan ra yewe zî nuştoxa Tunusî Zouhour Mecherguî bî û çimdarîyê xo neql kerd.

 

‘Ez bîya heyranê xoverdaşê cinîyan’

 

Zouhaour Mecherguî çimdarîyê xo yê derheqê Newroza Amedî de qal kerd û wina vat: “Semedê famkerdişê meseleya kurdî, no semedê mi îmkanêk hîra bî. Mi vîna. Bi rastî pîrozbayîyêk zaf pîl bî. Bi heybet bî. Mi nê nêpawitêne. Çîyê ke mi eşnawitibî zaf cîya bî. Zaf weş bî. Ez zaf bi tesîr bîya. Xoverdayîşê cinîyan tesîrêk pîl mi ser de kerd. Ez hemverê xoverdayîşê cinîyan de heyran menda.”

 

‘Ez vengdayîş muhîm vînena’

 

Zouhaour Mecherguî bale ant Rayberê Şarê Kurdî Abdullah Ocalanî û wina vat: “Ganî muzakere bêro kerdiş û problemî bêrê çareserkerdiş. No vengdayîş ma keyfweş kerd. Ma muhîm vînenê. Têkoşînê cinîyan her wareyî de est o. Semedê heqê xo xo ver danê. Bi rastî mi Neweroze de cinîyê xurtî vînayî. Ez zaf keyfweş bîya. Hêvîya mi zaf pîl bî. Cinî xo pawenê. Têkoşîn kenê. “

 

‘Ganî no vengdayîş erd de nêro verdayîş’

 

Zouhaour Mecherguî dîyar kerd pêwa hende rojî gamê somutî nêameyê eştiş û wina vat: “Ganî her kes goş bido vengdayîşê aştî û muzakere. No vengdayîş muhîm o. Hêvîya ma aya ke Tirkîya masaya aştî ser o rûşo. Ma nê wazenê û nê pawenê. Ganî veng bidê aştîye. Ganî lezkî cevabê nê vengdayîşî bêro dayîş.”