Neslîhan Kardaş-Memîhan Zeydan 

 

WAN- Cinîyê taxa Karşiyaka ya Wanî derheqê krîza ekonomî de qisey kerdî û dîyar kerdî ke sebebê nê krîzî îdarekarê welatî yo û vat: “Welat de krîzêk pîl est o. Sebebê nê zî dewlete zana. Sebebê krîzî Erdogan o. Sebebê her çî hukmat o.”

 

Krîzê ekonomî roj bi roje giran beno û no tesîr sifreyê Remezanî ser o zî keno. Cinîyê ke vejîyayî jî bazarê taxe, hewceyê keyeyî û werdî gênê, la bi baldarî gênê. Cinî mîyanê tezgahan de gêrenê ke çîyêk erjan bivînê. Cinî dîyar kenê ke nêeşkenê lazimîyê hewtane bigîrê. Cinîyan ard ziwan ke pêwa butçeyê bazarî zêde kerdê zî nêeşkenê çîyê lazimî bigîrê û agêrenê keye.

 

Cinîyê bazara taxa Karşiyaka ya Rêya Armûşê derheqê krîz û tesîrê ci de ajansê ma rê qisey kerdî.

 

‘Dewlete sebebê krîzî zana’

 

Nahayî Duman dîyar kerd ke pêro bazar gêra ya la berardişêk nêgirewta û vat: “Ez ancî eşkena lazimîyê xo bigîrî la xeylêk merdimî est ê ke nêeşkenê bigîrê. keyeyê mi kîra nîyo, la merdimê ke kîra de ciwîyenê est ê. Kîra vay a. Krîzêk pîl est o.  Dewlete sebebê krîzî zana. Her çî est o la vayî xeylêk zêde ya.”

 

‘Wexto ke vayî vînenê peyser danê ro’

 

Halîme Şekera ke 6 serrî yo bazar de esnafî kena wina vat: “Vayîya sebzeyan peraya. Kîloyê balîcane 200 lîra ya do însanî senî debare bikerê? Ez şuxilêna, bi hawayêk debara xo bikerî. La yê ke nêşuxilênê est ê. Muşterî yenê ewnîyenê vayî ra û peyser danê ro. Verê vayî estbî la hende nêbî. Berpirsîyarê krîzî Erdogan o. Her çî vay o. Merdimî dano zorî. Hêzê girewtişî nêmendo.”

 

‘Verê ma bi 300 lîra 10 poşet girewtêne’

 

Gulçîn Demîr zî wina vat: “Ma çîyêk nêgînê û agêrenê keye. Krîzêk pîl est o. Tutê mi keye de yê û betal ê. Ma bi pereyê teqawîtbîyayîşî debare kenê. Ma 6 nifûs ê. Ez bi 500 TL ameya bazar la qîmê çîyêk nêkeno. Vernîya ma roşan o. Her çî vay o. Verê ma bi 300 TL 10 poşetî girewtêne la ma nêeşkenê çîyêk bigîrê.”

 

‘Bi 200 lîra çîyêk nîno’

 

Hanîfe Yildiz dîyar kerd ke her çî vay o û wina vat: “Mi 200 lîra ard la pê çîyêk nêame. Ez şerm kena vajî. Ma 5 nifûs ê û bi zor debara xo kenê.” 

 

‘No serê sibayî mi tena poşetêk çî girewto’

 

Berîvan Kaya dîyar kerd ke 8 tutê aye est ê û mêrdeyê aye zîndan de yo û wina vat: “Serê sibayî ra gêrena. Mi tena poşetêk çî girewt. Ka ma eşkenê çi bigîrê? Ma aşma Remezanî de yê. Mecbûr ê dayîş û girewtiş bikerê. Ez bi 500 lîra ameya bazar. Her çî vay o. lane bîyo 120 lîra, marul bîyo 80 lîra. Krîzêk pîl est o. Roşan vernîya ma de yo. Merdimî est ê ke nêeşkenê tu çîyêk bigîrê.”

 

‘Sebebê her çî hukmat o’

 

Siyaha Şapkaci zî wina vat: “Ez nika nêeşkena tu sebzeyêk bigîrî. Ez bi 100 TL ameya la nêzana çi bigîrî. Ma lazimîyê xo nêeşkenê temam bikerê. Verê ma bi 150-250 ameyîne bazar, ma her çî girewtêne. Nika ma bi 2 hezarî nêeşkenê lazimîyê xo temam bikerê. Sebebê nê hukmat o.”