Nazlican Nujîn Yildiz

 

ÎZMÎR - Îzmîr de 21ê teşrîna verêne 2024ine de cinîya bi nameyê N.T. hetê camêrdo ke ci dir zewicyabî, hewl ame dayîş ke bêro qetilkerdiş. N.T. çîyê ke ciwîya û prosesê dewa qal kerd û dîyar kerd ke hetê keyeyê şikdarî ra yena tehdîdkerdiş û edalet waşt.

 

N.T. 14 serrî amî zewicnayîş û bi serran şîdet aye rê ame kerdiş. N.T. semedê şîdetî tutêke xo vînî kerd û 21ê teşrîna verêne 2024ine de camêrdo ke aye dir zewicnaye hewl da aye bi hacetê birnayîşî qetil bikero. N.T. va, her çiqas şikdar tepişte bo zî keyeyê şikdarî aye tehdîd keno û waştişê edaletî kena.

 

‘Edalet wazena’

 

N.T. va, 14 serrî de zewicyaya û camêrdo ke ey dir  zewicnaye bîya her tim şîdet aye rê kerdo, 8 aşmî digane bîya la şîdetî ra tuta xo vînî kerda û va: “Mi cenazeya tuta xo zî nêeşka bigîra. Keyeyê şikdarî her tim tehdîd û heqeretan keno. Ez çîyêk nêwazena. Destveradayîş wazena. Wa mi ra û tutanê mi ra dûrî bo. Di kênayê mi est ê. Cayê tutanê mi korîdorê edlîye de nîyo. Ez wazena tutê mi azad bê, şikdar cezaya xo bianco. Ez edalet wazena. Tu gane merg heq nêkeno. Kes nêwazeno bimiro. Wa şîdet nêvîno.”

 

Şikdarî va ez to qetil kena

 

N.T. da zanayîş ke verê dewaya veradayîşî akerda û va: “Di rojî mendibî dewa rê waşt ma pê bikerê. 4ê teşrîna verêne 2024ine de Stenbol de Îkbal Uzuner û Ayşenur Halîl hetê şikdar Semîh Çelîkî ra ameyî qetilkerdiş. Badê nê şikdarî ez tehdîd kerda. Kardî destê ey de bî û kay kerdêne. Mi va, ti se kenê, va ez to kişena planê ê kena. Ez tersaya. Ez keyeyê ey gêraya. Mi va, bêrê berê, do ma bikişo. Înan bawer nêkerd. Ma newe pê kerdibî. Vatî, yarîye keno. Rojêke veyva cîrananê ma estbî. Ma şî û agêrayî keye. Kênaya mi nêweşe bî. Mêrdeyê mi a roje fotografanê kênaya mi antêne. Serê sibayî şîya keyeyê cîranan. Mêrdeyê xo gêraya, mi va bê. Ey zî va, surprîzê mi est o. Bi kardî amebî. Ame bi kardî hêriş kerd.”

 

‘Ez bimerdêne do bivatêne întîxar?’

 

N.T wina va: “Mi çimê xo nêweşxane de akerd. Polîs û doktorî uca bî. Şikdar ame tepiştiş. Aşmêke û nîm ez erd de menda. Keyeyê ey dest bi tehdîdan kerd. Ceyran û awa mi birnayî. Bi hîrê, çar avûkatan ameyî dadgehe. Heqeret mi û avûkatê mi rê kerdî. Panc cayan ra kardî da mi ro, bi sî da sereyê mi ro. Nê pêro dosya de yê. La qebûl nêkerd. Ez venga her kesî kena. Şaşiyê mêrdeyê xo nêvînaye meyerê. Keye şikdarî paweno. Gelo ez bimerdêne do bivatêne întîxar o?”

 

‘Ez paştdayîş wazena’

 

N.T. tewr peyîn wina va: “Ez semedê Platformê Ma do Kiştişê Cinîyan bidê Vindarnayîş û sazgehê bînî yê cinîyan rê sipas kena. Eke ê verê mi de nêbîne ez o tena bimendêne. Belkî tutê mi nika yurd de bîne û ez zî stargeh de bîne. Başo ke ê est bî. Ez edalet pawena. Ez wazena tutanê xo dir azad biciwîyî û semedê nê zî têkoşîn bikerî.”