WAN - Pêwa ke 40 rojî vengdayîşê "Aştî û komelê demokratîkî" ke Rayberê Şarê Kurdî Abdullah Ocalanî 27ê Sibate de kerd ser o derbaz bîyo zî tu gamî nêameyê eştiş. Cinîyan bale ant babete ser o û vatî: “Wa dewlete gaman bierzo. Wa aştî û azadîya Birêz Ocalanî pê bêro. Şer nê ma aştîyêke bi rumet wazenê. La dewlete aştî nê, teslimîyet wazena. Dewleta tirkan hema tu game nêeşta.”

 

Rayberê Şarê Kurdî Abdullah Ocalanî badê pêvînayîşê 27ê Sibate de heyetê Îmraliyî dir kerd ra dima vengdayîşê "Aştî û komelê demokratîkî" kerd. No vengdayîşo tarîxî, Kurdistan, Rojhelatê Mîyanên û xeylêk cayê dinya de veng da. La pêwa ke 40 rojî vengdayîşî ser o derbaz bîyo, îqtîdar tu game nêeşto.

 

Cinîya derheqê babete de ercnayîş kerdî û dîyar kerdî ke ganî îqtîdar gaman bierzo.

 

‘Wa aştî û azadîya Birêz ocalanî pê bêro’

 

Sevkiyat Saglam da zanayîş ke ê sipasîyê xo semedê Rayberê Şarê Kurdî Abdullah Ocalanî kenê û aştîye wazenê. Sevkiyat Saglam wina va: “Ma azadî, aştî û edalet wazenê. Ma semedê Birêz Ocalanî azadî wazenê. Ma şer nêwazenê. Wa dewlete êdî gaman bierzo, averşîyayîş virazîyo. La hema zî dewlete ra tu veng çin a.”

 

‘Dewlete aştî nê, teslîmîyet wazena’

 

Meryem Tuncer zî rojbîyayîşê Rayberê Şarê Kurdî Abdullah Ocalanî pîroz kerd û wina va: “4ê Nîsane semedê ma şarê kurdî pîroz a. Ez roja şarê kurdî pîroz kena. Ma aştîye, azadîya birêz Ocalanî wazenê. Ma dewlete ra gaman pawenê. Wa êdî destê aştîye derg bikerê. Wa dest Rojawan, zozanan, welatê ma, dewanê ma ser o biancê. Ma aştî wazenê. Pabebîyayîşê ma aştîye ya.”

 

‘Wa dewlete destê aştîye derg bikero’

 

Asya Ozlu zî va ke ê bi serran o aştîye wazenê û wina va: “Çimê ma mesajêk vengê Birêz ocalanî bî. Bi serran o ma aştî wazenê. Mesajê Birêz Ocalanî semedê ma pêrûne bî moral. La hema Tirkîya gamêke nêeşta. Ma aştî wazenê. Wa gonî nêrijo û kes nêmiro. Ma birêz Ocalanî mîyanê xo de wazenê.”