DÎLOK - Derheqê rojnamegere Derya Ren de bi îdayê “heqaretî” 4 polîsan îdianame amade kerd û roniştişo ewil do 6ê gulane de bêro kerdiş. Îdianameyo ke ame amadekerdiş de dozgerî goş nêda heqaretê cinsperest yê polîsan ke endamê keyeyê Derya Ren rê kerdî û îdanameyêk sey pawitişê polîsan amade kerd.

 

Mûxabîra ma Derya Rena ke semedê xebera qetilkerdişê cinîyêke 7ê çele de qezaya Belqîsî ya Dîlokî de bî, şîbî qeza û amebî destbendkerdiş. Derya Ren ke hetê polîsan ra "şikdar" amebî destbendkerdiş û hetê polîsan ra heqaret ci rê amebî kerdiş û nîngî keyeyê aye rê amebî çînayîş. Derya Ren reaksîyon vera nê caardişan mojnabî. Derya Rena ke badê destbendkerdişê emnîyetî îfadeyê aye avûkatî dir amebî girewtiş û dima ra serbest ameye veradayîş. 

 

Badê serbestveradayîşê Derya Ren, polîsê bi nameyê Ferhat Aygun, Mehmet Uzunaslan, Mewlûd Sarikaya û Mustafa Pala bi îdiayê “heqaret” Serdozgerîya Komarê ya Nîzîpî de derheqê Derya Ren de gerre kerdî.

 

Serdozgerî qerar betal kerd

 

Serdozgerî qerarê nêtaqîbkerdişî derheqê gerreyê polîsan ke bi îdayê "heqaretî" kerdibî de dîyar kerd ke semedê kêmîyê delîlan lazimî bi taqîbkerdişî çin o. Badê nê qerarî polîsan muracatê Dadgeha Cezaya Sulhî ya Nîzîpî kerd û dadgehe zî bi sebebo ke delîlî tam ameyê vînayîş, qerarê nêtaqîbkerdişî betal kerd.

 

Dozgerî heqareto ke Derya Ren rê ame kerdiş nêvîna

 

Nê ser de hetê Serdozgerîya Komare ya Nîzîpî ra semedê sûcê "heqaretî" yê polîsan, îdianame ame amadekerdiş. Îdianameyo ke ame amadekerdiş de dozgerî heqaretê Derya Ren û keyeyê aye rê ame kerdiş nêvîna. Dozgerî ke heqaretê ke Derya Ren rê ame kerdiş nêvîna, delîlê somutî çinbî ke pêşkêş bikero va ke derheqê Derya de îdaname bêro amadekerdiş. 

 

Îdanameyo ke derheqê Derya de ame amadekerdiş hetê 5ine Dadgeha Cezaya Sulhî ya Nizîpî ra ame qebûlkerdiş. Do roniştişê yewin ê dewa 6ê gulane de bêro kerdiş.