AMED - Şaristanê Girdî ya Amedî, seba ke tutî hem keyf bikerê, hem zî aktivîteyanê fîzîkî û zehnî de ca bigîrê, mabênê tarîxanê 19-23 Nîsane de "Şahîya Wisarî ya Tutan" organîze kena.

 

Mudirîyetê Şaxê Xizmetanê Tutan ê Serekîya Daîreya Xizmetanê Sosyalan, Serekîya Daîreya Xizmetanê Ciwanî û Sporî, Serekîya Daîreya Karê Kulturî û Sosyalan û Serekîya Daîreya Xizmetanê Astengdar û Pîran bi hemkarîye û bi piştgirîya şaredarîyanê qezayan, mabênê tarîxanê 19-23 Nîsane de bajar de Şahîya Wisarî ya Tutan organîze kena.

 

Çalakî de tutî beşdarê kodkerdişê robotîkî, rîtim, resim, hunerê Ebruyî, atolyeya drama û felsefe, sporê futbol û basketbolî û nawitişê anîmasyonî benê.

 

Tutî wexto ke keyf kenê, bi aktivîteyanê fîzîkî û zehnî xo aver benê û bi kay û xebatanê atolyeyan zî şansê keyfkerdişî vînenê.

 

Nawitgehê hunerî do bêro akerdene

 

Zêdeyêr, Qada Ciwîyayîşê Pîya ya Sumerparkî de mabênê tarîxanê 19-23 Nîsane de nawitgehê resman ke eseranê boyaxê zeytî ra virazîyayê û tutan bi keda xo hazir kerdî, Galerîya Hunerî de do seba zîyaretî bêro akerdene. Nawitgeh, her roje mabênê saetanê 13.00-17.00 de do akerde bo.

 

Çalakîyî do 5 rojî dewam bikerê

 

19 Nîsane Şeme Parka Aştî yê Kayapinarî de taxa Huzurevlerî de; 20 Nîsane Yewşeme Burcê Hewt Birayan de qezaya Sûrî de, 21 Nîsane Dişeme Parka Tenûre de Taxa Şêx Şamîlî de Baxlarî de, 22 Nîsane Sêşeme Qada Halî de Taxa Ferîtkoşkî de qezaya Yenîşehîrî de, aktivîteyê sporî, parkurê kayan, kayê aqil û zekaî, çalakîya boyaxkerdişê rîyî û atolyeyê muzîk, resim û felsefe do bêrê organîzekerdene.

 

Mabênê tarîxanê 19-23 Nîsane de zî Qada Ciwîyayîşê Pîya ya Sumerparkî de qezaya Yenîşehîrî de; kodkerdişê robotîkî, viraştişê kaykerdoxanê texteyî, hunerîya viraştişê kerreyan, rîtim, deyîr/kilam, resim, Ebru, heqê gedeyan, atolyeya drama û felsefe, aktivîteyê sporî, nawitişê anîmasyonî bi tutan û çalakîyê parkurê kayan do bêrê organîzekerdene. Pêro çalakî mabênê saetanê 14.00-17.00 de do bêrê kerdene.

 

Reyna çarçewaya çalakîyan de mabênê tarîxanê 19-23 Nîsane de nawitişê sînema do bêrê organîzekerdene. Merkezê Kulturî û Kongre yê Çand Amedî de 19 Nîsane de "Şînok", 20 Nîsane de "Maşa", 21 Nîsane de "Çewlika Keyweşe", 22 Nîsane de "Hîkayeya Kaykerdoxî" 4, 23 Nîsane de zî nawitişê filmê "Nîko Vera Roştîyan" do bêro kerdene. nawitişê fîlman saete 14.00 de do bêrê organîzekerdene.