ANQARA - Pakîze Sînemîllîoglu derheqê serdayîşê keyeyê ke badê vengdayîşê ‘aştî û komelê demokratîkî’ ameyê destpêkerdiş de qisey kerd û va: “Serdayîşî de ma bawerîya bi aştîye, xurtbîyayîşê vengdayîşê Birêz Ocalanî vînenê. Her cayî de hêvîya şarê ma estbî; şar wazeno lezkî aştî pê bêro.”

 

Partîya Têduştî û Demorkasî (DEM Partî), badê vengdayîşê ‘aştî û komelê demokratîkî’ yê Rayberê Şarê Kurdî Abdullah Ocalanî dima, bi amancê komelbîyayîşê vengdayîşê kombîyayîşê şarî pê ard û badê zî 10ê nîsane de serdayîşê keyeyan dayî destpêkerdiş.

 

Endama Meclîsê Partîye (PM) Pakîze Sînemîllîoglu derheqê babete de qisey kerd.

 

‘Ma şarî dir mîyanê têkiliyî de yê’

 

Pakîze Sînemîllîoglu dîyar kerd ke 10ê nîsane yê  serdayîşê keyeyan pê anê û va: “Hemverê propaganda û ziwanê ke hewl danê aştî qels bikerê, ma şarî dir mîyanê têkiliyî de yê. Bi vatişê sey ‘do tena çekî bêrê çalkerdiş, teslîmkerdiş, aştî do wina pê bêro’ hişê şarî têmîyan kenê. Hemverê nê de ma hewce bi qalkerdiş dî û ma yew bi yew şarê xo rê qal kenê. Girseyêk ma yê pîlî est ê. Ma wazenê yewser şarê xo rê qalî bikerê. Şarê ma pêwa her çî aştî wazeno.”

 

‘Sebeb butçe şerî rê yena visnayîş’

 

Pakîze Sînemîllîoglu dîyar kerd ke şarê kurdî û pêro şaran bedelê pîlî dayê û va: “Ma şertê şerî ciwîyenê. Bi taybetî hemverê şarê kurdî de şer ameyo îlankerdiş. Ganî êdî aştî bêro herra Rojhelatê Mîyanên ser. Êdî bes o. Semedê çimeyê welatî şerî rê yenê visnayîş, şar feqîr beno. Waştişêk şarî est o; wazenê lezkî aştî pê bêro. Aştî do semedê pêro kesî bi feyde bo.”

 

‘Ma hêvîye bi aştîye pîl kenê’

 

Pakîze Sînemîllîoglu tewr peyîn wina va: “Ma her pêvînayîşî de waştişê aştîye eşnawenê. Ma qezaya Yenî mahale de serdayîşê keyeyêk de 60 kesî dir ameyî têhet. Ma pîlkerdişê hêvîye, bi pêvînayîşan kenê. Ma 1ê Gulane de meydanan de veng da. Şar wazeno wayîrê vengdayîşî vejîyo û aştî pê bêro.”