Elfazî Toral

 

STENBOL - Gulseren Yolerî dîyar kerd ke binpaykerdişê heqan yê zîndanan hetê selahîyetdaran ra yeno peygoşkerdiş û va: “Îqtîdar nê keno babeta bazarî. Heqê merdiman nêeşkeno bibo babeta bazarî. Semedê problemî werte ra bêrê wedaritiş, ganî her kes hîsgêrî bimojno.”

 

Binpaykerdişê heqan yê zîndanan her ke şinê zêde benê. Tepişteyê nêweşî nînê dermankerdiş û pêwa rewşa ke nêeşkenê tepişte bimanê zî nînê veradayîş. 28ê nîsane de Komeleya Heqê Merdiman (ÎHD) raporê xo eşkera kerd û goreyê raporî 335 ci ra giran hezar û 412 tepişteyê nêweşî est ê. Rapor de ame vatiş ke nînan ra 161 hebî cinî yê û 1251 zî tepişteyê camêrd ê.

 

Temsîlkara hemserekîya pêroyî ya ÎHD’yî Gulseren Yolerî derheqê binpaykerdişê heqan yê zîndanan de qisey kerd.

 

Gulseren Yolarî wina va: “Ma binpaykerdişê heqan yê zîndanan rayapêroyî dir pare kenê. Semedo ke binpaykerdişî bêrê vînayîş û çareserkerdiş, hewldayîşêk ma yê pîl est o. Bi taybetî çend sernameyî vejênê vernî. Demê peyîn de îşkence û caardişê nêbaşî zaf zêde yê. Problemê girêdayeyê tecrîdî vejênê werte. Xoresnayîşê edaletî, têduştîya înfazî de cîyakarî û xeylêk bînî. Bi taybetî xoresnayîşê heqê weşîye cayêk muhîm gêno. Zîndanan de hetê dermankerdişî de şert û mercê başî yê cuye de problemê pîlî est ê. Rîskê nêweşîyan zêde yo, problemê hîjyenî est o.”

 

Hezar û 412 tepişteyê nêweşî

 

Gulseren Yolerî bale ant serê raporê 28ê nîsane û wina va: “Ma 28ê nîsane de raporê xo pare kerd. Goreyê raporî 161 cinî û 1251 tepişteyê camêrdî bi pêroyî 1412 tepişteyê nêweşî est ê. Nînan ra 335 ci ra nêweşê giran ê û ci ra 230 kesî nêeşkenê tena cuya xo dewam bikerê. 105 zî semedê cuya xo dewam bikerê, lazimî bi paştdayîş vînenê. 188 kesî semedê nêweşîyê xo ganî binê kontrolî de bê û 515 kesî zî pêwa nêweşîyê înan ameyê vatiş zî semedo ke xo nêresnayê raporan teberê lîste de ca gênê.”

 

‘Nêeşkeno bibo babeta bazarî’

 

Gulseren Yolerî derheqê prosesê Tirkîya kena de wina va: “Destpêk de tespîtê Devlet Bahçelî yê derheqê heqê hêvîye û tecrîdî de bîyî babeta vatişî. Na game pozîtîf bî. La heqê merdiman nêeşkeno bibo babeta bazarî. Binê nameyê prosesî de pêvînayîşî yenê kerdiş. Prosesî de ma vanê heqê hêvîye, heqê merdimayîye yo. Nêzdîbîyayîşê îqtîdarî o yo ke heqê merdiman keno babeta bazarî. Ma sey pawitoxê heqê merdiman ganî pawitişê heqê merdiman biwazê. Tirkîya de problem tena qanûnan de nîyo. Caardişê qanûnan de zî problem est o.  Semedê nê problemî bêrê wedaritiş, ganî wareyê huqûqî de bername yan zî plansazîyê meclîsî bêrê kerdiş.”