Gulîstan Gulmuş

 

DÊRSIM - Kurdistan de cinî hetêk ra averşîyayîşê ekonomî dir têkoşîn kenê, heto bîn ra zî binê zextê zihnîyetê camêrdan de têkoşînê cuye danê. Cinîyê ke xeylêk warê cuye de zahmetîyan ancenê sey “ezab” bi name kenê.

 

Krîzê ekonomî her wareyê cuye yê Kurdistanî de dewam keno. Semedê krîzê ekonomî şert û mercê cuye roj bi roje xidarêr benê û debara cuye hema vaje resaya sewîyeya xelayî. Pêwa krîzo ke dewam keno, zîhnîyetê feodalî zî serdest o. Cinî hetêk ra krîzê ekonomî dir têkoşîn kenê, heto bîn ra zî zîhnîyetê pederşahî têkoşînê cuye danê. Cinî debara xo kenê, ewnîyenê tutan ra, karê keyeyî yê rojane kenê û zîhnîyetê pederşahî dir têkoşîn kenê.

 

Dewa Avşekîrî ya qezaya Pertagî ya Dêrsimî de cinî bi qerardarîyêk pîl têkoşînê cuye danê. Cinîyê tîya debara xo bi weykerdişê pesî kenê. Cinîyê ke bi serran o bi weykerdişê pes meşgul benê û hewl danê xo feqîrî ra xelas bikerê û sey “ezîyet” bi name kenê. Dewa Avşekîr de Îpek Kûltûr û Gulîstan Kala ajansê ma rê qalê cuya xo ya xidar kerdî.

 

'Karêko bîn ke ma bikerê çin o'

 

Îpek Kultur, dîyar kerd ke bi serran o weykerdişê pesî dir eleqedar ê û wina va: "Ez 10 serrî verê ameya tîya. Tîya cuya xo dewam kena. Pesê ma estbî, ma înan rot û ma xo rê keye kîra kerd. Ma yê ke mendê dir debara xo kenê. Wexto ke ez serê sibayî wurzena mêşinanê xo bena çernena. Dima ra arayîya kênaya xo hazir kena. Ma heta şan de xebityenê. Karêko bîn ke ma bikerê çin o. Roja ke ez zewicyaya heta nika ez nê karî kena. La heta key ma do nê karî bikerê ez nêzana. La heta peynîya cuya xo ma do nê karî nêkerê.”

 

‘Derdê cinîyan nêqedêno’

 

Gulîstan Kala zî dîyar kena ke bi serran o bi weykerdişê pesî hewl danê debara xo bikerê. Gulîstan Kala dewam de wina va: "50 serrî yo ez tîya ya. Zaf lazimîyê ma est ê û her çî vay o. Ma wazenê şiwanêk pesê xo rê bigîrê la xeylêk pere wazenê. Zaf problemî est ê, vayî pêro çadiranê tîya rijnayî. Dej û derdê ma nêqedêno, heta ewro ma roşnayîya roje nêdîya. Çîyêk nîno vurnayîş û cinî dej ancenê.”