STENBOL - Dayîka Aştîye Rewşan Doner derheqê têkoşînê kadroyê serkêşî yê PKK’yî Alî Haydar Kaytan û Rizan Altun û sewbîna qerarê feshî yê PKK’yî de qisey kerd û va, ganî dewletr gaman bierzo û va: “Berpirsyarî êdî milê dewlete ser de yo. Ganî lezkî gamî bêrê eştiş û proses sabote nêro kerdiş.”

 

Badê vengdayîşê "Aştî û komelê demokratîkî" yê Rayberê Şarê Kurdî Abdullah Ocalanî 27ê Sibate de kerd, PKK’yî 12ine kongreya xo viraşt û qerarê feshî da. Tesîrî ci dewam keno. Pêwa nê averşîyayîşan dewlete hema gamêke somut nêeşta.

 

Eynî wextî de PKK’yî dîyar kerd ke kadroyê serkêşî yê PKK’yî Alî Haydar Kaytan û Riza Altun zî dinyaya xo bedelnayî. Serekê TBMM’yî Numan Kurtulmuş  pêşnîyaz kerd ke bi nameyê ‘Stratejîya Tirkîya ya Bêteror ê Seserra Neweyî; Komîsyonê Paştdayîşî û Yewîye Neteweyî’ meclîs bêro awankerdiş. Serekê MHP’yî Devlet Bahçelî zî va, ganî komîsyonêk 100 endamî û 16 partîyê sîyasî pê yeno awan kerdî. Meclîs de gamêke senîn bêro eştiş hema dîyar nîyo.

 

Dayîka Aştîye Rewşan Donder derheqê babete de qisey kerd.

 

‘Ma do têkoşînê înan dewam bikerê’

 

Rewşan Doner dîyar kerd ke ê yadkerdişê kesê ke têkoşînê azadîye de dinyaya xo bedelnayî rêzdar ê û va: “Wa sereyê şarê kurdî û Abdullah Ocalanî sax bo. Ma şarê kurdî deyndarê Alî Haydar Kaytan û Riza Altunî yê. Ma bi têkoşînê înan heta ewro ameyî. Kurd êdî her cayê dinya de yenê zanayîş. Bi xêrê têkoşînê înan şarê kurdî êdî eşkeno vajo nasname, ziwan û kulturê mi est o. Ma soz danê înan heta peynîya cuya xo ma do têkoşîn dewam bikerê.”

 

‘Têkoşîn newe ra dest pêkeno’

 

Rewşan Doner dîyar kerd ke têkoşînê Alî Haydar Kaytan û Riza Altun do semedê têkoşînê înan bibo nimûne û wina va: “PKK 52 serrî yo têkoşîn keno. Dewleta tirkan ya hemverê şarê kurdî şer kerdêne, semedê şarê kurdî va, ‘terorîst ê’.  Dimayê vengdayîşê "Aştî û komelê demokratîkî" yê serekîye PKK’yî adirbest îlan kerd û qerarê feshî da. Êdî kes nêeşkeno vajo ke PKK terorîst o. PKK bi qasê zerdî, bi qasê awe pak o. Nê mojnayo her kesî. PKK’yî fesh kerd la têkoşîn newe ra dest pêkeno. Ma prosesêk muhîm ra derbaz benê. Ganî her kes nê îmkanê başî bişuxilno. Ganî dewlete lezkî gaman bierzo. Ganî no proses nêro sabotekerdiş.”