Rojda Aydin- Dîlan Babat 

 

ŞIRNEX - Kerdox Yusuf Açar ke Şirnex de desteştişê 12 tutan kerd, vejîya werte ke Antalya de zî desteştişê tutêk kerdo. Keyeyê tutî reaksîyon mojna û va: "Dewlete wexto ke biwaza kesan bitepişna, tepişnena. No kerdox senî eşkeno ke tiryakî bikero nê bajarî? Derûdorî de mobese est ê. Ganî ma tewr zêde nê çîyan ser o vinderê ke hedîseyê nê rengî nêrê ciwîyayîş.”

 

Şirnex de kerdoxo bi nameyê Yusuf Açar ke ewilî vejîya werte desteştiş 4 tutan rê kerdo, 11ê hezîrane de hetê dadgehe ra bi sûcê “îstîsmarê cinsî yê tutan” ame tepiştiş. Dimayê tepiştişê kerdoxî vejîya werte ke desteştişê 12 tutan kerdo. Dimayê ke xeylêk desteştişî keyeyê xo rê qal kerdî û hedîse vejîya werte.

 

Keyeyê tutêk ajansê ma rê qisey kerd.

 

Tiryak dayo tutan

 

Dayîka tutî, dîyar kerd ke vernîya roşanê qûrbanî tut hetê Yusuf Açar ra bi desteeştişî dir rî bi rî mendo.  Dayîka tutî dîyar kerd ke tut semedo ke şêro berber keye ra vejîyayo û dima ra waşto ke şêro verê hevalanê xo û wina va: “Dima ra Yusuf Açar bi motorsîkletê xo nêzdîyê tutî mi beno û ey esparê motorsîkletî keno. Tutê mi vernê de espar nêbeno, la dimayê ke îkna keno espar beno. Dima ra tutê mi ra vano, ‘karêk mi est o, ez ey hel bikerî dima ra to bidî keye’. Tutê mi mabêne kuçeyan de dûr fîneno  û tutê mi perseno û vano, ‘Ti mi benê ça?’ Tutê mi beno teberê bajarî. Tutê mi fikrîyayo ke do o kes ey bikişo. Beno cayêk koyî û tarî. Dima ra tutê mi ancî vano, ‘to çira mi ard nê cayî?’ La kerdox cewab nêdano. Dima ra bi zor hewl dano ke tiryakî bido tutê mi. Semedo ke tutê mi qebûl nêkeno kerdox ci rê hêrs beno. Dima ra bi hawayêk bîn tiryakî dano.”

 

Hewldayîşê tecawuzî

 

Dayîka tutî, dîyar kerd ke kerdox Yusuf Açar vatişê cinsî tutî rê kerdo û her tim ferman dayo tutî û wina va: “Tutê mi fotografê kerdoxî anto û nê ser de kerdox reaksîyon mojnayo. Kerdox Yusuf Açar desteştiş tutî rê kerdo. Semedo ke tutê mi destûr nêdayo kerdox ancî bi hêrs kewto. Tut dest bi bermişî kerdo. Bi zor cilê tutî vetê û hewl dayo ke desteştiş bikero. Tut ancî reaksîyon mojnayo û kerdox dest bi heqaretan kerdo. Dima ra tutî cayêk dûrî de verdeno. Dima ra tut pîyê xo gêra û pîyê ey  bi lez şi û tutî uca ra girewt. Tutî ard keye. Dima ra çîyê ke ameyî sereyê tutî yew bi yewe qal kerd. Dima ra ma tutî berd nêweşxane.”

 

Hewl da tutêk bîn zî biremno

 

Dayîka tutî dîyar kerd ke dimayê hedîse ê vejîyayê taxe û kerdoxî gêrayî û va: “Dimayê rojêke tut hevalanê xo ra vano. Ê tutî zî eynî kesî tarîf kenê. Vejîya werte ke no kerdox desteştiş nê tutan rê zî kerdo. Dimayê nê tutî ameyî verê mi. Tutê mi tehdîd kerdo û vato ‘ez o tim nê cayan de bî’. Firine de şuxilêno. Demo ke her kes ê gêrayîne, tutî vînenê ke tutêk bîn zî verê ey de yo. Tutî hevalanê xo û birayê xo gêrenê. Ê tutê qijî destê kerdoxî ra xelas kenê la kerdox remeno. Dima ra ma pêro merdimanê tutan gêrayî û vejîya werte ke xeylê tutî rastê desteştişî ameyê. Dima ra ma şî emniyet gerre kerd. Demê sereştişî keyeyî de o kes nêame destbendkerdiş. Keye ra remabi. Roja bîn pêro şarê Şirnexî hedîse eşnawit û medyaya dijîtale ser o edalet gêrayî.”

 

Kerdox bajarêk bîn de deseştişê tutêk kerdo

 

Dayîka tutî, dîyar kerd ke keyeyê kerdoxî ameyo verê înan û semedê gerreyê xo peyser biancê xeylêk çî kerdê û wina va: “Ma ra vatî gerreyê xo peyser biancê ‘ma do kerdoxî bişirawê bajarêk bîn’. Keyeyê kerdoxî waşt ke serê na hedîse bêro padayîş. Ez qebûl nêkena ke no kerdox teber de rehet bigêro. Eke bişîne bajarêk bîn do uca zî desteştiş bikerdêne. Derheqê Yusuf Açar de Antalya de zî eynî babete de dosyaya ey est a. La tu çîyêk nêame kerdiş û o kes ame tîya. Merdimê ey zanayîne û bêveng mendêne. Oyo ke ez zana desteştişê 15 tutan kerdo, hîn 4 keyeyê tutanê bînan zî tersî ra nêeşkenê qisey bikerê. Dimayê ke keyeyan zêde reaksîyon mojna, merdimê kerdoxî cayê ci vatî û polîsan ey tepişt. Ma vengê xo bi hawayêk hewl da ke bidê eşnawitiş. Ma 3 keyeyî gerre kerd û muracat kerd la nika 12 tutî est ê.”

 

Kerdox tiryakî çara peyda keno?

 

Dayîka tutî, dîyar kerd ke ganî baro û sazgehî paştdayîş bidê înan û va: “Na dewlete wexto ke biwazo eşkena kesan bitepişno. No kerdox senî eşkeno ke tiryakî bikero nê bajarî? Nê tiryakî çara peyda keno? Pêro cayê bajarê ma de qemerayê mobese est ê, no senî eşkeno tiryakî rehet bikero? Ganî ma zêdeyêr nê çîyan ser o vinderê, da ke  bajarê ma hedîseyê bi nê rengî nêrê ciwîyayîş.”