STENBOL - Rayberê Şarê Kurdî Abduyllah Ocalanî seba Heyetê Ewropa mesajêk erşawit ke wazenê ey reyde pêvînayîş bikerê û vat: “Ez hêvî kena ke atmosfero ke winasîn de ke komelo demokratîk bêro awankerdene, ma rî bi rî yewbînan bivînê.”

 

Heyeto ke 39 kesan ra yeno pê, çarçewaya kampanyaya “Ez wazena Abdullah Ocalanî bivîna” ke pêşengîya Platformê Aştî û Azadîye yê Ewropa (EFFP) de ameye destpêkerdene, waştişê vînayîşê Rayberê Şarê Kurdî Abdullah Ocalanî kerd.

 

Heyet tayê pêvînayîş û dayîşûgirewtişan ra pey otêlêka Taksîmî de kombîyayîşê “Masaya Gilover” de ame têhet.

 

Kombîyayîşî de mesajê Abdullah Ocalanî ke seba Heyetî erşawitbi, ame wendene.

 

Mesaj wina yo:

 

“Dostê erjîyayeyî…

 

Seba mi gelekî manadar û erjîyaye yo ke şima rayîrêko hende dûrî ra ameyê, hewl danê cigêrayîşê azadîye ya ke şexsê mi de şênber bîyo, bikerê rojev û eynê wextî de wazenê mi reyde pêvînayîş bikerê. Heme çî ra ver ez nê hewldayîşî tena sey piştgirîyêka şexsî yan zî cigêrayîşê azadîye yo şexsî nêvînena; ez nê sey parçeyêkê îradeyê cuya azade ya şaran a pîya û çareserîya demokratîke, aştîya komelkî vînena.

 

Mi azadîya xo ya şexsî tu wext azadîya komelî ra cîya nêdîye. Xora mi tim vatêne, heta ke azadîya komelî nêra ca, manayêka rasteqîn a azadîya şexsî do çin ba. Nê semedî ra ez na gama şima seba ameyoxo demokratîk ê hempar ê şaranê ma, sey hetkarî û vengdayîşêko bicesaret vînena.

 

Haya mi waştişê şima yo seba pêvînayîşî est a. Ez hêvî kena ke rojan vernîya ma de şert û mercî pêvînayîşêko winasînî bêrê awankerdene. Na çarçewa de ez silam û hurmetanê xo pêşkêşê her kesî kena ke-tena seba mi nê, her keso ke hetkarîya cigêrayîşê azadîye û îradeyo demokratîk ê şaranê ma kerdo- kede daya.

 

Bi hêvîya ke rojanê azadan de, atmosfero ke winasîn de ke komelo demokratîk bêro awankerdene, ma rî bi rî yewbînan bivînê…

 

Abdullah Ocalan

 

Hepisxaneyê Ewlekarîya Berze yê Tîpê F’yî yê Îmraliyî.”