Rozerîn Gultekin

 

STENBOL - Temsîlkara Hemsereka Komeleya Heqê Merdiman (ÎHD) Gulseren Yolerî dîyar kerd ke PKK’yî îradeyê xo yê semedê aştîye dinya rê mojna yo û ganî êdî gamê ver bi demokratîkbîyayîşî hetê dewlete ra bêrê eştiş. Gulseren Yolerî va, "Vurnayîşê berpirsiyarî pê ameyo."

 

Serê dawetkerdişê Rayberê Şarê Kurdî Abdullah Ocalanî, 11ê Temmuze de herêma Şikefta Casenî ya dewa Silêmanîye de hetê Koma Aştî û Komelê Demokratîkî ra merasîmêk semedê veşnayîşê çekan ame organîzekerdiş. Temsîlkara Hemsereka Komeleya Heqê Merdiman (ÎHD) Gulseren Yolerî beşdarê merasîmî bî û prosesê averşîyayîşî ser o û merasîmî ser o ercnayîş kerd.

 

Prosesêko ke hêvî pîl benê 

 

Gulseren Yolerî dîyar kerd ke ê serdemêk pîlbîyayîşê hêvîyê semedê aştîye derbaz benê û va: "Beşêk muhîm yê komelî wazeno ke no proses bi piştrastî bêro kerdiş. Eşkerayîya Serekkomarî bi temamî nê esasî ser o bî la ey berpirsîyarîyê dewlete roşn kerd. No zî muhîm o, semedo ke bi kêmî qebûlkerdişê nê çî û bi nê rengî rayapêroyî rê îfadekerdiş eşkeno endîşeyê dewamê prosesî ser o kêmî bikero. Ma eşkenê wareyê nêzdîbîyayîşê hem dewlete û hem zî yê PKK’yî yê babete ser o qalê cîyayîyê muhîmî yê prosesê bînî bikerê."

 

Prensîbê komîsyonî do çi bê?

 

Gulseren Yolerî dewam de wina va: "Eke şima metodê xebate, îqtîdar, sînorê îqtîdarî û wezîfeyê ci bi detay dîyar nêkerê, beno ke komîsyon nêeşko xeylêk çîyan bi dest bikero. Ma meraq kenê ke prensîbê xebate yê komîsyonî çi yê. Do beşêk nê dîyar bikero ka ma çi hêvî kenê. Komîsyon do bieşko heta cayê ke destûr ci rê ameyo dayîş de xebate bikero. Zelalkerdişê na çarçewa piştî awankerdişê komîsyonî do dîyar bikero ka no komîsyon do prosesê demokratîkbîyayîşî de rolêko krîtîk kay bikero yan nê. Awankerdişê komîsyonêk 'fermî' zaf muhîm o. Xeylêk prosesê aştîye yan prosesê çareserkerdişê nakokîyan de çar hetê dinya, awankerdişê komîsyonêk fermî mîyanê Parlamentoyî de şertêk vernî yo."

 

‘PKK îradeyê xo yê semedê aştîye dinya rê mojna’

 

Gulseren Yolerî ke beşdarê merasîmê tarîxî yê bêçekkerdişî bî wina va: "Ameyîşê gerîlayê PKK’yî semedê cayê hedîse, mendişê înanê uca, eşkerayîyê ke demê prosesî de ameyê dayîş, veşnayîşê çekan û prosesê dimayê şîyayîşê înan. Nê pêro bi ciddî û profesyonelîyêk pîlî ameyê amadekerdiş, hema hema tu ca semedê şaşîyan nêverdayo. PKK’yî îradeyê xo yê semedê aştîye bi hawayêk zaf zelal dinya rê mojna. Mîyanê ma de dayîkê ke tutê înan mîyanê şerê gerîla de bî yan zî dinyaya xo bedelnabî estbî.  Bêşik, her kes zaf bi endîşe bî. Bi vatişêk bîn, endîşe estbî ka no proses do senî dewam bikero."

 

Hîsê ke serkêşîya Bese Hozat cinîyan ser o viraşto

 

Gulseren Yolerî dîyar kerd ke cinî sey koma ke bi serran o semedê aştî û heqê merdiman têkoşîn kenê, yenê vîrê merdimî û serkêşîya merasîmî ya Bese Hozate na rastî reyna kerd. Gulseren Yolerî va, "Sey cinîyêke, sey şexsêk ke hemverê sîstemê serdestîyê camêrdan vinderte aye xeylêk rûmet da ma pêro cinîyan. Aye bi kûrayî tesîr ma ser o pêrûne kerd.”

 

‘Ma prosesêko winasî de nîyê ke bêro peygoşkerdiş’

 

Gulseren Yolerî wina peynî kerd: “Prosesêk krîtîk o. Ma prosesêk winasî de nîyê ke bêro peygoşkerdiş.  Nimûne; rewşa qanûnî ya 30 gerîlayê ke a roje uca de eşkerayîyêke dayî do senîn bo? Heta nika cewabêk nê çin o. Ganî ma semedê nê çîyêk bikerê. Ez nê çî bi baldarî qetî kena, semedo ke her kes yewbînan ra çîyêk hêvî keno û ma xeylêk rey şahidîya nê çî kerda. Waştişê aştîye hewcedarî û waştişêk hempar ê pêro komelî yo. Lazimî oyo ke warêk ma yê bingehîn yê têkoşînî bêro naskerdiş û nê wareyî de bi lez û bez xo birêxistin bikerê.”