MÛŞ - Dayîkê gerîlayanê ke dinyaya xo bedelnayê û dayîkê tepişteyanê nêweşan dîyar kerdî ke ê semedê gamê ke ameyê eştiş keyfweş ê û vatî: “Rayberê Şarê Kurdî Abdullah Ocalanî û PKK’yî bawerî dano ma.”

 

Rayberê Şarê Kurdî Abdullah Ocalanî 27ê Sibate de vengdayîşê ‘aştî û komelê demokratîkî’ kerd û prosesêk newe dest pêkerd. Dimayê vengdayîşê Abdullah Ocalanî, gerîlayê Koma Aştî û Komelê Demokratîkî (BDTG) bajarê Silêmanî yê Başûrê Kurdistanî de merasîmê çek veşnayîşî pê ardî. Dayîkê gerîla û tepişteyanê nêweşan derheqê prosesî de qisey kerdî.

 

‘Ganî êdî dewlete gaman bierza’

 

Dayîka gerîlayê HPG’yî Zeynep Çelîk (Sara Berîtan) û Çetîn Çelîk (Mahîr Kop) Ayten Çelîk dîyar kerdî ke ganî dayîkê leşker û gerîlayan mebermê û wina va: “Wa huqûq pê bêro. Gerîlayan çek veşna. Înan berpirsyarîyê xo ard ca. Ganî êdî dewlete gaman bierza. Wa êdî kes mebermo. Wa tepişteyê nêweşî bêrê veradayîş. Çimê dayîkan rayîr de yo. Wa heq û huqûq semedê kurdan bibo. Çimê dayîkan rayîr de yo. Wa heq û huqûq semedê kurdan bibo. Hende bedelî ameyê dayîş û têkoşînêk pîl est o.”

 

‘Ganî destûrê bingehîn de vurnayîşî bêrê kerdiş’

 

Waya Sara Berîtan û Mahîr Kop, Aysel Çelîk zî ard ziwan ke vengdayîşê Abdullah Ocalanî yê 27ê Sibate de kerdo, xeylêk bi erc o û wina va: “No vengdayîş xeylêk muhîm o. Dewlete game eşt û şî verê serekî. No muhîm bi. Serek û PKK bawerî dano ma. Bawerîya ma bi dewleta tirkan çin a. Merdimî dejê pîlî ciwîyayî. Bi serran o dayîkî bi hesreta tutanê xo ciwîyenê est ê. Ganî nasnameyê kurdî bêro qebûlkerdiş. Ma nê wazenê. Ganî dewlete gaman bierza. Heq û huqûqê ma zî est o.”

 

‘Ganî dewlete êdî zûran nêkero’

 

Dayîka tepişteyê nêweşî yê ke zîndan de dinyaya xo bedelnaye Celal Şeker, Îffet Şeker zî dîyar kerd ke şerêk 50 serrî yo dewam keno est o û merdimî ameyê qetişkerdiş. Îffet Şekere dewam de wina va: “Wa na aştîye bi xêr bêra. Kurdî yenê tepiştiş, yenê surgunkerdiş. Ciwanê kurdî yenê qetilkerdiş, cinî yenê qetilkerdiş. Hîn mecbûr mendî ke welat terk bikerê. Tîya ra tepîya wa dayîkî mebermê. Wa tepişteyê nêweşî bêrê veradayîş. Lajê mi nêweş bî, tepişte bî. Heta berdî morg zî destê ey kelepçe kerdibî. Heta ma defin kerd, polîsî dorê ma de bî. Wa no şer peynî bibo.”

 

‘Çimê ma rayîrê tepişteyanê nêweşan o’

 

Dayîka gerîlayê HPG’yî Hatîp Kiliç (Şervan Egîd) ke dinyaya xo bedelnayo, Emîne Kiliç zî bale ant serê prosesî û va, ê aştîye rê bi hêvî yê û wina va: “Tutê ma semedê zilm û îşkence şî koyan. Wa pêro tepişteyî bêrê veradayîş. Ma waşt ke tutê ma aştî bivînê. Pêro gerîlayî tutê ma yê. Çekan veşnayî. Ma semedê înan aştîye wazenê. Wa dewlete gaman bierza. Çimê ma rayîrê tepişteyan de yo.”