Azîze Akoglu

 

ANQARA - Ozgul Sakî va ke komîsyona ke semedê cigêrayîşê şîdetî û qetilkerdişê cinîyan meclîs de ameyo awankerdiş, cayo ke şîdet û qetilkerdişî meşrû keno de yo. Ozgul Sakî va ke raporê 912 rîpelê komîsyonî de nêkewtişê sebebê şîdetî û raporî ser o şerh dayê ro.

 

Bajaranê Tirkîya û Kurdistanî de şîdet û qetilkerdişê cinîyan bi polîtîkayanê bêcezayîye her ke şîno gird beno. Semedê cigêrayîşê şîdet û qetilkerdişê cinîyan, meclîs de Komîsyonê Cigêrayîşî yê Meclîsî yê Hemverê Vernîgirewtişê Şîdetî û Bêtêduştîya Cinîyan ser o ame awankerdiş. Wexto ke komîsyon ame awankerdiş Hulkî Cevîzoglu bi serekê ci û hetê cinîyan ra ame dîyarkerdiş ke îqtîdar polîtîkayanê dişminî şuxulneno. Çarçewaya xebatanê komîsyonî de xeylê akademîsyen û huqûqnasan ercnayîş kerd û çapemenî de bernameyanê ke şîdetê cinîyan ser meşrû kenê rexneyê pîlî girewtî. Komîsyon xebate qedêna û raporêk 912 rîpelî amade kerd. Parlamenterê Partîya Têduştî û Demokrasî (DEM Partî) ke komîsyon de ca girewtî vatî ke rapor de sebebê şîdetî nêmojnayê û nûqteyê çareserîyê de semedo ke rapor de nêameyo pêşkêşkerdiş şerh dayê raporî ser.

 

Parlamentera DEM Partî ya Stenbolî Ozgul Sakî ke komîsyonî de ca girewtêne derheqê babete de qisey kerd.

 

Pey înfalê komelî komîsyon ame akerdiş

 

Ozgul Sakî va ke înan sey koma DEM Partî desine rey waştiş kerdê ke sebebê qetilkerdişê cinîyan bêrê cigêrayîş û semedê akerdişê komîsyonî pêşnîyazî dayê. Ozgul Sakî va: “Waştişê ma bi rayanê AKP-MHPî red benê. Dimayê ke Îkbal Uzuner û Ayşegul Halîl Stenbol de bi xofî ameyî qetilkerdiş, înfal ame ciwîyayîş. AKPî nê ser de komîsyoneyek awan kerd.”

 

Serekê komîsyonî mêrde ame weçînayîş

 

Ozgul Sakî va ke înan teberê polîtîkayanê îqtîdarî de muhîmî danê nê komîsyonî û va: “Sekreterya komîsyonî partîyanê îqtîdarî ra ame awankerdiş. Serekê komîsyonî zî Hulkî Cevîzoglu ame weçînayîş. Ma fam kerd ke înan wazenê çi vajê. Semedê nê komîsyonî weçînayîşê serekê mêrdeyî xora mesaj bî. Teberê nê de ma sey DEM Partî semedê çareserî çi destê ma ra ame ma kerd.”

 

‘Nêewnayî Sebebê şîdetî ra’

 

Ozgul Sakî va ke semedê cigêrayîşê şîdetî cinîyan ser o lazim o sebebê şîdetî bigeyrê û wina va: “Ma zaf reyan Peymana Stenbolî ard rojeve û ma va ke lazim o qanûnê 6284 bica bîyarê. Roja verên Hulkî Cevîzoglu bi vatişê xo cinî bêqîmet verda. Komîsyon de hiqûqnas û akademîsyenî derheqê şîdetî de xebatêk kerd. Raporêk 912 rîpelî ame amadekirdiş. Ma verê va ke no lazim o cîlt bibo. Yê ke rapor wendî vatî ke sebebê esasî yê şîdetî lazim o eşkera bibo. Lazim o ma xebatêk ciddî yê derheqê bingehê şîdetî bikerdêne.”

 

Şerh dayî raporî ser

 

Ozgul Sakî peynîya qalkerdişê xo de wina va: “Vernîya raporê 912 rîpelî de ma perspektîfêk pêşnîyaz kerd. Ma sererastkerdişê cidî yê şên pêşnîyaz kerd. Ma hişyarîyê xo kerd la no hişyarî rapor de ame peygoşkerdiş. Ma şerh komîsyonî rê nuşt. Nuştişê şerhî hetê tarîx de muhîm bî. Ma vatişê xo şerhî de eşkera kerd. Ma derheqê cinîyê multecîyan ke hemverê şîdetî de bêpawitiş manenê de pêşnîyazê xo kerd. La çi heyf nê pêşnîyazî hetê komîsyonî ra nêameyî hesibnayîş. Komîsyonî xebate peynî kerd û rapor qedêna. Qerarê pawitişî bi tesîr nînê caardiş. Lazim o hemverê şîdetê komelî de berpirsîyarîyê xo bigîrê xo ser û têkoşîn bikerê.”