
‘Azadîya Abdullah Ocalanî azadîya komelî ya’
- 10:30 14 Teşrîna verêne 2025
- NAROJANE
Buşra Turan
WAN - Cinîyê ke waştî ke tecrîd û komployê 27 serran ê hemverê Rayberê Şarê Kurdî Abdullah Ocalanî bêro peynîkerdiş, waştî ke komîsyonê parlamentoyî semedê pêvînayîşî serdayîşê Îmralî bikero û vatî: “Eke azadîya Abdullah Ocalanî çin bo, azadîya ma zî çin a.”
Komployê mîyanneteweyî ke 9ê teşrîna verênê 1998î de bi hemkarîyê hêzanê mîyanneteweyî bi serbestverdayîşê Rayberê Şarê Kurdî Abdullah Ocalanî yê Sûrîya ra dest pêkerd, nika 27 serrî pey xo de verda. Ewro, komplo; bi polîtîkaya tecrîdî Girawa Îmraliyî de dewam keno.
Dayîkanê Aştî, partîyê sîyasî û beşê cîya-cîyayê komelî waştî ke rayîrê aştî û dîyalogî Rayberê Şarê Kurdî Abdullah Ocalanî rê bêrê akerdiş. Cinîyê ke waştî komîsyonê parlamentoyî semedê pêvînayîşî serdayîşê Îmralî bikero, hem bale ancenê rewşa tepişteyanê nêweşan ser û hem zî vanê ke cinî bê Abdullah Ocalanî azad nêbenê û komel bê azadîya cinîyan, azad nêbeno.
‘Ganî komîsyon şêro Îmrali’
Dayîka Aştî Gozel Erdemli va ke 27 serrî yo komployêk hemverê Abdullah Ocalanî est o û ê wazenê ke no komplo bêro peynîkerdiş. Gozel Erdemli va: “Ma aştî û têduştî wazenê û ma wazenê ke proseso ke dest pêkerd dewam bikero. Ma wazenê komîsyono ke Parlamentoyî de ame ronayîş bingehê têduştî û aştiye ser o xebata xo dewam bikero û komîsyon şêro Îmrali û semedê aştîye Birêz Abdullah Ocalanî dir pêvînayîş bikero.”
‘Serekî tarîtî kerd roşnayî’
Dayîka Aştî Asya Ozle, sey heme şarê dinya, va ke wazena Rayberê Şarê Kurdî Abdullah Ocalanî mîyanê şarê kurdî de bo û va: “Birêz Abdullah Ocalanî no proses da vernîya ma û heme dinya ey qebul kena. Semedê ma, Serekî nê prosesî dir tarîtî kerd roşnayî. Ganî ma zî nê prosesî ko bikerê û hereket bikerê. Sey şarê kurdî, ma wezîfeyê xo caard; ma şertê Birêz Abdullah Ocalanî qebul kenê. Ganî dewleta tirkî zî wezîfeyê xo ca bîyaro. Bes o; ma bi mergî nêeşkenê biresê tu ca. Ne ê û ne zî ma ganî nêmirê. Eke Ocalan azad nêbo, ma zî azad nêbenê.”
‘Ganî tepişteyî serbest veradîyê’
Asya Ozle sewbîna qetî kerd ke tepişteyê ke zîndanan de cezayanê xo ancenê zî serbest nînê veradayîş û tepişteyê nêweşî ke binê mergî de yê zî vera nêdîyenê. Asya Ozle wina dewam kerd: “Êdî bes o. Ganî dayîkê tirkî sey ma aştiye biwazê, destê xo bidê yewbînan û piştgirîya nê prosesî bikerê. Çi heyf, hema înan gamêk nêeşt. Ganî nika qebul bikerê û gamêk vernîya aştiye bierzê. Ma wazenê ke no komplo bêro peynîkerdiş. Ewro, xeylêk cayanê dinya de semedê azadîya Birêz Abdullah Ocalanî çalakî yenê viraştiş û ma tîya yê. Ma aştî û azadîya bi rûmetî wazenê.”
‘Ez semedê azadîye Amed ra heta Anqara rayîr ra şîya’
Endama îdareya qezaya Payizawayî ya Partîya Têduştî û Demokrasî (DEM Partî) Seçkîn Tunç va ke komployê hemverê Rayberê Şarê Kurdî Abdullah Ocalanî bi serran o sey şerêk zereyî yo û va ke ma wazenê no komplo bêro peynîkerdiş. Seçkîn Tunç va: “Dayîkê ke tutê înan dinyaya xo bedelnayê bermenê. Ma wazenê nê berê şerî ke bi seserran o akerde yo bigîrê, no komplo batal bikerê û peynî bikerê. Ma waşt ke rayîrê dîyalogî bêrê akerdiş û gamî semedê viraştişê cematêkê demokratîkî bêrê eştiş. Sey ke Birêz Abdullah Ocalanî va, komelo ke heta cinî azad nêbê, nêbeno azad. Ma, cinî û dayîkî, semedê azadkerdişê komelî kuçeyan de yê. Ez Amed ra heta Anqara rayîr ra şîya; ma êdî nêwazenê dayîkî bibermê û tutê înan bêrê qetilkerdiş. Ma semedê her di hetan aştîye wazenê; ma wazenê komplo bêro batalkerdiş û rayîrê dîyalogî bêrê akerdiş.”